Sawrkarin a hmuna thawktute thurawn a ngaipawimawh hle – Dy. CM

Sawrkar department thawktuten an hnathawhna hmun atana tha tur thu an rawn leh ngaihdan chu sawrkarin a ngaipawimawh hle tih deputy chief minister Tawnluia chuan a sawi.
Tuichang bialtu MLA, deputy CM ho hian Thawhtanni khan Khawzawl district-a head of office-te an thukhawm a. District thar enkawl chu awm lo ata thil awmtir a nih angin, chona tam tak a awm tih a sawi. Ramin harsatna hrang hrang hriat lawk leh ruahman lawk loh a tawh avanga sum lama harsatna awmte sawiin, heng harsatna karah hian sawrkar chuan chhungkaw tin khaichhuah chu thupui bera neiin, flagship program – SEDP chu a theih ang angin nikum atangin a kalpui tan tih a sawi. Sawrkar department hotute chu Khawzawl district-an enkawl avangin bial mipui aiawhin lawmthu a hrilh a, duhthawhna vanga tawngkam na leh an ngaihdan piahlam a lo sawi a nih chuan an ngaihdam leh hriatthiamna a dil tih a sawi a ni.
Khawzawl town chhunga head of office-te chu model code of conduct-in a phuar hma hun tlemte chhunga hmalakna tam thei ang ber neih a nih theih nan an office kalphung inhrilhtawn a, hmathar lakna tur inbengvarna hun atan he thutkhawm hi hmang turin a sawm a. Sawrkar chuan a hmuna thawktute ngaihdan leh thurawn a ngaipawimawh hle tih a sawi a ni.
District Civil Supplies office, District Fisheries Development office, Public Health Engineering office atangin an hmalakna, hmachhawp leh an harsatnate ngaihthlak a ni a. PHE aiawh hian Vangtlang khua tui lakna tur chu peihfel thawkhat a ni tawh a, enchhinna (trial) kalpui mek niin, duhthusama khua a that veleh hman theih thuai a beiseiawm tih an sawi a ni.
Khawzawl SP office chuan internet chungchanga harsatna an sawi a. DC office-in an hmalakna leh chetvelna langsar zual an report bawk.