Sawrkarin alu chi a siam dawn
Sawrkarin alu chi a siam dawn
Mizoram sawrkar Agriculture and Farmers’ Welfare department hmalakna in Thingdawl Agriculture Farm-ah alu chi siamna tur ruahman a ni a, a dahthatna tur, ni zung chakna hmang cold storage chu Ningani khan a changtu minister PC Vanlalruata’n a hawng.
Kuthnathawktute harsatna lian tak pakhat chu a hun taka thlai chi tha hmuh a ni thin lo chu a ni tih minister hian a sawi a. Alu chi tha pawh a hun taka kan hmuh thin loh avangin kan thar chhuah tur ang kan thar chhuak thei loa, a hun taka a chi kan hmuh theih chuan kan thar tam ngei a rinawm tih a sawi a ni.
Metric tonne 100 len theihna cold storage hi Model Organic Farm Thingdawl, Kolasib district-a sak a ni a. NABARD RIDF-XXVII Scheme atanga sak niin, cheng nuai 258.89 hman a ni. He sum hman zat atang hian nuai 245.94 hi NABARD loan niin, nuai 12.95 hi state matching share a ni.
Ningani vek khan Krishi Vigyan Kendra Kolasib-in Indian Agricultural Research Insitute New Delhi atanga a hmuh alu chi chu Agriculture and Farmers’ Welfare minister PC Vanlalruata hian kuthnathawktute hnenah a sem a. Kolasib, Mamit leh Lawngtlai district chu agriculture kaihhnawiha ‘potential’ nei tha em em an nih laiin, sawhthing erawh a that theih lohna an ni thung a, mithiamten zirchiang se a duh tih a sawi. Kuthnathawktute chu a thlawna thil sem ringawta lungawi lo in, mithiam rawn chung zel a, model ni turin a fuih.
Agriculture director R Lalnunzira chuan chuan Thingdawl Agriculture Farm-ah alu chi a siam chuah theih tawh dawn tih a sawi bakah a vawnthatna tur cold storage pawh bun a ni tih a sawi a ni.
KVK Kolasib senior scientist & head Dr Michelle C Lallawmkimi pawhin, Mizoram-in alu chi kan la intodelh lo a, kumtin a chi hi hmun dang atanga ngaihtuah a ngai ziah a, hei vang hian hma taka alu chin kawngah nasa tak in harsatna a awm phah thin tih a sawi.
KVK Kolasib hian kuthnathawktute hnenah alu chi quintal 96 a sem chhuak tawh a, variety 10 enchhin tawh niin, Kolasib district huamchhunga khaw 11 an tuam tawh a ni.
Minister hian SASCE (2022- 2023) sum hmanga sak Plant Health Clinic a hawng nghal a ni.