Sawrkarin chhiatna thlen dan report centre-ah thehlut dawn

Cyclone Remal avanga chhiatna thleng dan kimchang chu Mizoram sawrkarin sawrkar laipui hnenah a thehlut dawn a, hemi atana tih tur tul relin Ningani khan a kaihhnawih sawrkar department hotute chu chief secretary Dr Renu Sharma kaihhruaiin an thu.
Disaster Management & Rehabilitation department atangin chhiatna thleng hrang hrang report a ni a, department secretary-ten an department hmalakna leh harsatna an sawi a ni.
Report pek danin, PWD chuan leimin avanga hmun hrang hranga kawng ping thenfai hna an thawk zel. PHED-in tui pek chhuahna khawl chhia a awm nual avangin tui pek chhuah theih a tlem rih dawn a, tui ren tura mipui ngenna thu chhuahin, rang taka khawl siamthat an tum mek.
P&E department chuan kawlphetha pek chhuahna khawl sub-station tam zawk chu an siamtha tawh a, kar khat chhung chuan sub-station zawng zawng siam zawh hman an inring. FCS&CA-in Champhai, Aizawl leh Serchhip district-ah buh leh vaimim tlem a chhia tih an sawi a, harsatna tawkte an tanpui mek.
Zangnadawmna leh chhawmdawlna pek chungchangah rang taka pek a nih theih nan mamawh ang ang report thuai turin chief secretary hian department hotute a chah a. Sawrkar laipui hnenah report thehluh a ni dawn a, heng department panga – PWD, DM&R, PHE, P&E leh FCS&CA secretary-te vawiin, May 31 chawhmaah report thehluh turte peih fel hman turin a chah a ni.
Department hrang hrang hotuten an hmazawna tih tur awm an thawh danah thawk tha in an rang tih Dr. Renu Sharma hian sawiin a fak a. Dinhmun hrechianga mahni chanpual chin vil tha turin a fuih. Chhiatna thleng leh palh theiah kal dan tur mumal tak (standard operating procedure) nei theuh turin a chah a; chhiatna laka mipui him zawk theih nan in sak dan, kawr siam dan leh kawngpui siam danah kalphung tha zawk ngaihtuah chhuak turin a chah bawk.