Synod Bookroom in cheng nuai 800+ in budget khum

kum kalta, 2023-2024 khan cheng nuai 800 chuangin an budget a khum a, kum 1911-a Synod Bookroom din a nih atanga kum khata an thawhchhuah tam ber kum a ni.
Ningani khan Synod Bookroom Conference 2024 Aizawlah neih a ni a, Mizoram puma Synod Bookroom zawng zawng chu hemi ni hian khar a ni.
Bookroom sum dinhmun report-a a lan danin, kum kalta khan Synod Bookroom hian nasa takin hma a sawn belh a. An budget Rs. 15,77, 00,000 chu tha taka khumin Rs. 24,61, 77,315 a thawk chhuak. Kum 1911-a Synod Bookroom din a nih atanga kum khata an thawh chhuah tam ber tum a la ni a, budget khumna hi Rs. 8,84, 77,315 a ni. Hemi hma kuma an thawh chhuah pawh Rs. 2,64, 49,501 in an khum a ni.
Mizoram puma branch hrang hrang atangin report leh rawtna ngaihthlak a ni a. Kum kaltaa Bookroom rawngbawlna hrang hrang thlirletin, sawizau a ni. 2023- 2024 a Synod Bookroom Branch tha thlan an ni a. 1-na Synod Bookroom Headquarters Showroom Aizawl, 2-na Synod Bookroom Zemabawk North Branch Aizawl, pathumna Synod Bookroom Chanmari Branch Aizawl a ni.
Tun dinhmunah Synod Bookroom hian Branch 16 neiin Distribution Centre 45 a awm a ni.