Sawrkarin CSR pe thei a dap
Sawrkarin CSR pe thei a dap
Mizoram sawrkar din, Corporate Social Responsibility (CSR) Cell chuan tunkar hian hmasawnna hnathawhna tur CSR Fund tam zawk a hmuh theih dan dapin Bangalore-ah an kal a. UNDP nen tangdunin CSR pe chhuak thin mimal leh pawl nen an inkawm.
CSR Cell hi an chairman, adviser to chief minister (Finance) TBC Lalvenchhunga, MLA leh Planning secretary Lalmalsawma Pachuau te kaihhruaiin an kal a. IIM Bangalore-a NSRCEL leh NASSCOM start-up hub hotute an kawmnaah Mizoram-in sustainable development goals tihlawhtling tura a ruahmanna leh chumi atana CSR pe thei pawl thawhpui an mamawh dan an sawipui.
Heng pawl lian pahnih hian Mizorama start-up sector lo thang lian chho meka hma lak ve an chak thu leh state hmasawn zelna atana kawng thar tam tak (innovative solutions) dap theih an inring a ni.
UNDP nen tangdunin CSR fund pe chhuak thin private sector, corporate foundation, philantrophic group leh CSO aiawh mi 40 vel nen an inkawm bawk a. Zirna, skill development, employment, entrepreneurship, women empowerment, health, sports leh climate change lamah sum tlem zawk senga tunlai thiamna hmanga awmze nei zawka hma lak theih dan an sawiho.
CSR fund pe chhuak thin pawl hian Mizoram CSR Cell hmalakna hi an ngaihluin, sawrkarin SDGs tihlawhtling tura a ruahmanna an phurpui tih an lo hrilh a ni.
Team leader TBC Lalvenchhunga chuan Mizoram chu hun rei tak India ram state zinga CSR dawng tlem ber a ni a. CSR hmang hian hmasawnna hna tha tak tak thawh theih a nih avangin, chief minister Pu Lalduhoma’n private sector leh civil society organisation nen thawhhona tam zawk neih tumin CSR Cell hi din a ni tih a sawi. A theih ang angin hma an la nghal a, tunkar hian UNDP nen tangdunin Bangalore-ah stakeholder-te nen an inkawm ta a, hei hian rah tha tak a chhuah ngei dawnin an hria tih a sawi a ni.
UNDP South India regional head Jeya Chandran chuan state sawrkarin a ruahmanna tihlawhtling tura hetiang zawnga hma a lak an hriat vawikhatna a ni, tiin, Mizoram CSR Cell-in danglamna (change) thlen kawngah midang tan pawh entawntlak thil a ni tih a sawi.