Sawrkarin kuthnathawktute chawikan ngaipawimawh ber

Agriculture minister
Sawrkar tharin kuthnathawktute chawikan a ngaipawimawh ber a, hemi tihlawhtling tur hian sawrkar kalphung (policy) pawh an duang tih Agriculture and Farmers Welfare minister PC Vanlalruata a sawi.
Vaphaia Block Agriculture Office leh Animal Feed Processing Plant chu Zirtawpni khan Agriculture minister hian a hawng a. Vaphai Primary Agriculture Credit Society pisa a tlawh bawk. Kuthnathawktuten awlsam zawka thlai thar an hralh theih nan thlai chi li rate mumal tak sawrkarin a bithliah tawh a, thlai dang pawh tih chhoh zel tum a ni tih a sawi.
Chief minister kaihhruaina hnuaiah buh hum lei dan tur ngaihtuah mek a ni tih a sawi a. Thlai rate mumal tak bakah kuthnathawktute tan crop insurance pawh tih chhoh tum a ni tih a sawi. “Sawrkarin kuthnathawktute hmakhua atan sum leh pai hman a tum a, mipui chu sawrkar atanga hamthatna dawngtu ‘beneficiary’ mai ni loa, sawrkar thawhpuitu ‘partner’ ah kan ngai a; hmasawnna rahbi nghet leh tluantling zawhpuiah ka sawm a ni,” a ti.
Cooperation minister ni bawk PC Vanlalruata chuan Primary Agriculture Credit Society (PACS) chu sawrkarin bank-te tih theih ang zawng zawng ti ve thei turin a thuam tih a sawi a. Mipuiin tangkai zawka an hman theih a tul tih a sawi a ni.
Khawbung BAO Vaphai hi Border Area Development Project 2013- 2014 sum cheng nuai 10 hmanga sak a ni a. Kum 1979 atanga ding tawh Agriculture Department Circle Office chu 2021 March 9 khan Block Agriculture Office-a hlankai niin, Khawbung RD Block hnuaia khuate a huam a ni.
Animal Feed Processing Plant hi Vaphai PACSo din a ni a. Warehouse, pisa, kudam, transformer leh a panna kawng laih nan cheng nuai 47 sen a ni. Thlai herna khawl leh hriak herna khawl hi sawrkar laipui scheme – PMJVM hnuaia Van Dhan Vikas Kendra kaltlangin Cooperation department-in a bun sak a ni.