Sawrkarin MCS hamthatna a ngaihpawimawh sak thin – Deputy CM

MCS-te chu sawrkar kutke pawimawh tak an nih avangin sawkarin an tana hamthatna a ngaihpawimawh sak thin tih deputy chief minister Tawnluia chuan a sawi.
Mizoram Civil Service Association (MCSA) Conference vawi 47-na chu Zirtawpni khan Aizawlah hman a ni a. He hun hmanpuitu deputy chief minister chuan ram rawngbawl kawnga chanvo hrang hrangah mahni kuta tla chanvo theuh ram leh hnam tan tia tha taka hlen zel chu mitinte mawhphurhna a ni, tiin a sawi a. MCS Association member-te chu sawrkar kutke pawimawh tak an nih avangin sawkarin an tana hamthatna leh tuldang a ngaihpawimawh sak thin tih a sawi.
MCS-te chu public service nihna zawnah mipui rawngbawl hna thahnemngai taka thawk zel turin a fuih a. An thiamna leh finna a tangkai thei ang bera hmang turte, zahawm taka awm zel tur leh hmasawn tum tlat turin a fuih. Department hrang hranga hna pawimawh tak tak chelh an nih hlawm avangin midang nena thawkho thiam mi nih tum turin a chah a. Tih dan phung pangngai maia lungawi loa, awlsam leh mawihnai zawk, mipui tana zangkhai leh tha zawka hna thawh tum thin turin a chah bawk.
Sum leh pai harsatna karah thawktu indaihlohna phuhru turin sawrkarin tan a lak zel thu leh service tih changtlun leh tih phuisui kawngah pawh ngaihtuahna a sen a tul tih deputy CM hian a sawi a. Pawl thil thlente a tul anga bawhzui tum a nih thu a sawi.
MCSA president H Lianzela chuan pawl hmalakna sawifiahin mamawh a sawi a. Nikum conference leh vawiin inkarah pawl member promotion hmu 39, superannuation pension 3 leh IAS a hlankai 4 an awm thu sawiin, pawl member discipline hrang hrang atanga kalkhawmte chu an thiamnate Mizoram tana tangkai taka hman tum zel turin a chah.