Sawrkarin Mizoram buh thar a lei

Pangbalkawn Kolasiba Om Om Modern Rice Mill-ah Mizoram buh thar chu Ningani khan lei \an a ni a. A rate hi kumin atan kg. ah Rs.. 30 zel a ni anga, a kum azirin rate an puang \hin dawn.
Buh thar lei \an puala inkhawm hmanpuitu Agriculture & Farmers Welfare minister PC Vanlalruata chuan, buh hum lei chu ZPM manifesto-ah tel ve lo mah se, sawrkarin loneitute hmakhua a ngaihpawimawh avangin pilot project atan Mamit leh Kolasib-ah bul \an a ni tih a sawi.
Sawrkarna chang tawh ten policy hran theuh an nei a, ZPM sawkar policy chu kuthnathawk leh loneitute dinhmun chawisan a, anmahni kaltlanga ram tih hmasawn a ni, tiin, “Loneituten an tharchhuahawlsam taka an hralh zung zung theihnan sawrkar chuan market linkage a ngaipawimawh hle a, loneitute leh market suihfin kan tum a, kan suihfin mek a ni,” a ti.
Tun hi a bul tanna a ni a. Kum lokal zel turah pawh hmun hrang hrangah sawrkarin loneitute buh tharchhuah a leina hmun – rice mill chu hmun hrang hrangah a awm zel a beisei minster hian a sawi.
Buh leina atan state pawna Mizoram sum cheng tamtak a chhuak thin chu a vei tih sawiin, “Kan economy siam turin kan ramah ngei hian sum lengvak a tam a ngai. Chumi puitlin tur chuan loneitute tan la zual sauh turin ka chah a, kuthnathawktute tan sawrkar a ding reng dawn a ni,” PC Vanlalruata hian a ti.
FCS&CA secretary Zodingpuii sawi danin, Mizoram sawrkar chuan Mizoram pawn lam atangin thlatin buhfai quintal 44000 vel a lei thin a. Chumi man atan chuan thla tin cheng vaibelchhe 15 vel a kalral. “FCS&CA department chuan sum thahnem tak ram danga luang chhuak mai loa Mizoram thar atanga lei hun kan nghakhlel hle. Hemi piahlamah hian Mizoram thar buhfai ration-a sem theih vek hun kan nghakhlel takzet,” a ti.
Agriculture special secretary Ramdinliani chuan tun tumah hian mimal, FPO, PACS leh society hrang hrang atang buhhum lei tur quintal 418 an phur thleng. Mizoram loneitute atanga buhhum lei hi sawrkarin policy anga neih ngheh chhoh a tum mek a, loneitute harsatna hria in central aia man sang zawkin Mizoram sawrkar chuan cheng 30-in support price a puang tih a sawi. Loneituten hlawk zawka an thar theih dan tur sawrkar chuan a ngaihven tih a sawi bawk.
Tal buh thar lei tanna hi Bana Kaih Policy hnuaia Mizoram sawrkarin phai atanga buhfai chawkluh thin tihtlemna tur leh loneituten an tangkaipui zawkna tura ruahman a ni a. Kolasib leh Mamit district chu pilot project atan puangin, buh hi khaw hrang hrangah mimal emaw FPO emaw FPC emaw society dang kaltlangin an phurkhawm thei a, an phurkhawmna rate erawh anmahni inbiakremna a ni ang. Sawrkar chuan kg-ah Rs.30 zelin a leisak dawn a ni.