Saza kaptu jail-ah dah

Saza kaptu jail-ah dah
Wildlife (Protection) Act 1972 (nungcha humhalhna dan) bawhchhiaa silai hmanga Saza kaphlumtua puh Lalrinpuia, Sairang Vengsang chu Environment Forest & CC department thawktuten manin December 1 khan Central Jail-a dahluh nghal a ni.
Deputy conservator of Forest Aizawl Wildlife Division Margaret Lalramchhani sawi danin, kumin November 28-a report an dawn chu Aizawl Wildlife Division thawktute chuan bawhzuiin Buichali bazar-ah ramsa leh sava rep leh a hring an man a. Hemi kaihnawihah hian Lalrinpuia, Sairang Vengsang chu November 30 khan manin a sa zawrh tura a pek chhuah Saza sa kg.5 vel leh a kahna silai (SBBL gun) chu an man tel.
Sairang Forest Range office-ah a statement lak a nih hnuin Lalrinpuia hi November 30 zan khan Aizawl Police Station-ah dah a ni a, December 1 khan judicial magistrate 1st class hmaah hruai niin, hemi tlai hian Central Jail lama dah luh a ni. Saza sa man hi tawih chhe thei a nih avangin magistrate hian halral phalna a pe nghal a ni.
Saza hi Wildlife (Protection) Act 1972 hnuaiah Schedule-1 ramsa a ni a, kum 3-7 thleng lung in tan emaw Rs. 25000 thleng chawitir theih emaw a pahniha hrem kawp theih a ni.