Sazu-in palpuah bomb kam hmuchhuakin record siam

Sazu-in palpuah bomb kam hmuchhuakin record siam
Sazu pakhat, Ronin tia a hming an phuah chuan palpuah bomb 100 chuang hmuchhuakin, Guinness World Records a siam. Ronin hi kum 5 a ni tawh a, sazu zinga palpuah bomb kam hmuchhuak hnem ber a la ni.
GWR-in a tarlan danin Ronin hian 2021 atang khan Combodia-ah palpuah bomb kam 109 a hmuchhuak tawh a, he sazu hi pawl pakhat Apopo ten palpuah bomb hmuchhuak thei tura an zirtir a ni.
Apopo thupuangtu Lily Shalom chuan, “Ronin hi zirtir a nuamin a thluak a hmang thiam hle a, palpuah bomb han zawn chhuah vel hi nuam a ti hle a ni,” a ti a. Ronin enkawltu Phanny pawhin, “Ronin thil tih hian sazu te theihna a lantir a ni. Ani hi kan hmanraw pakhat a ni satliah mai lo a, kan thawhpui hlu tak a ni,” a ti ve bawk.
Ronin te ang chi hi an hriselnain a tawrh loh nan ni khatah minute 30 vel chauh hna an thawh tir thin a, an kum a tam deuh hnuah chuan an hna atangin an chawlh tir ve thin.
Cambodia hi palpuah bomb tamna ram niin, an tualchhung indona hi 1998 khan tawp tawh mah se ram square kilometer 1,000 vel zet chu palpuah bomb phum rukna a nih avangin hman hleihtheih a la ni lo. Cambodia hi mihring tam dan atanga tehin palpuah bomb avanga ke tan ngai tam berna pawl niin, mi 40,000 chuang hetiang bomb avanga ke tan an awm tawh.
Ronin rawn lar hmaa record siamtu chu Magawa niin niin, he sazu pawh hian kum nga chhungin palpuah bomb 71 a hmuchhuak hman a, 2022 khan a thi ta a ni.