SC-in bonds details pe vek turin ti

Supreme Court chuan March 18 khan State Bank of India (SBI) chu electoral bonds data pekchuahah ‘dik leh fel’ taka tia pekchuah bik tur thlang lo turin a ti a, Election Comission of India (ECI) in a tihchuah tur unique hidden alphanumeric leh serial number tin te pawh pechhuak vek turin a ti.
“SBI chu electoral bonds kimchang pechhuak tura beisei in ni a. In rilru puthmang hi ‘details pek tur min hrilh ula kan pechhuak chauh ang’ tih ang mai a ni. SBI hian a pekchhuah tur a thlang tur a ni lo. SBI hi court lakah dik leh fel takin a awm tur a ni” tiin Chief Justice of India D.Y. Chandrachud, five-judge Bench kaihruaitu chuan SBI aiawh senior advocate Harish Salve hnenah a sawi a ni.
Court chuan ECI hnena electoral bonds information ah chuan ‘a leina leh contribution receipt kimchangin’ pek vek tur a ti bawk a.
Bench chuan SBI Chairman Dinesh Kumar Khara chu Ningani tlai lam dar 5 hma ngeia Supreme Court hnena “SBI chuan electoral bonds details kan kawl te chu a bo abang awm lovin kan pechhuak vek” tih affidavit thehlut turin a ti bawk.
SBI in electoral bonds details ECI hnena a pekchhuah hnuah ECI chuan information kimchang chu a upload nghal tur a ni bawk.
Bench chuan February 15, 2024 a electoral bonds scheme hmanga an hming leh nihna thup tlat nena political funding an pek theih dan April 12, 2019 atanga hman tan chu a nuaibo tiin a sawi chiang nawn bawk a ni.
Court chuan NGO, Citizens Rights Trust te senior advocate Vijay Hansaria leh advocate Sneha Kalita te dinsak tena March 1, 2018 atanga April 12, 2019 inkar chhunga electoral bonds lei zawng zawng pawh phochhuak tura a ngenna chu a hnawlsak thung a. NGO te chuan khami inkar chhung khan 9,159 bond Rs 4,000 crore hu political party te hnenah pek a ni tiin a sawi a.
Bench chuan thutlukna a siam tawh chuan April 12, 2019 atanga electoral bonds lei chin a bithliah tawh tia sawiin February 15 a thutlukna a siam tawh khawih danglam leh chu a dik lo a ti a ni.
Bench chuan cut-off date atana April 12, 2019 a tihna chhan chu he mi ni hi court in interim order hmanga stakeholder te hnena hriattirna a pekchhuah ni a nih vang a ti a.
March 15 khan Supreme Court chuan SBI hnenah ECI in a tihchuhah atan eng vanga electora;l bonds alphanumeric number chu pe tel lo nge a nih a zawt tawh a.
Thawhtan khan court chuan February 15 a ruling a lo siam tawh dik taka zawm a nih theih nan unique number te chu pekchhuah ngei ngei tur a ti zui bawk a ni.
Court chuan kimchang takin electoral bonds lei ni, a lei zat, a leitu hming, political party chung bond te tlantu te chu pholan vek tur a ti a. Court chuan SBI chu ECI lakah engmah thup nei lo turin a ti bawk.
Hearing neihnaah Salve chuan SBI chuan poll bonds detail pekchhuah chu pawitihna emaw hrehna tur an nei lo a ti a. “Public institution kan ni a. Pawn lamah SBI chu Supreme Court thupek zawm tha duh lo anga sawi kan ni” tiin Salve chuan a sawi a.
Chief Justice Chandrachud chuan SBI te chu ‘eng nge alphanumeric numbers thil tum’ tiin zawhna a siam thung a. “Eng nge alphanumeric number pawimawhna? Security feature nge audit trail puih nana siam zawk” tiin Chief Justice chuan a zawt a.
Court chuan bond ah redeeming branch te chuan engtiangin nge alphanumerics chu an hman tia zawt bawkin, “Bank in bond chu a lem nge atak tih fiah nana a hman em ni?” tiin Chief Justice Chandrachud chuan a zawt a.
Advocate Salve chuan number strip te chu ultraviolet light hmanga enfiah a nih thu in a chhang a ni.