SC-in ED chief Sept 15 thleng remti

Supreme Court chuan special hearing a neihnaah Enforcement Directorate (ED) Director Sanjay Kumar Mishra ‘mipui leh ram tan’ thawk turin September 15, 2023 thleng a hun a pawhsei sak a.
Court chuan a hma July 11 khan Mishra-an ED director hna a chelh zui zel tum chu ‘dik lo leh dan kalh’ tia sawiin July 31 hmaa chawl turin a lo ti tawh a ni.
Mahse a chawlh hun tiam ni li lek a la awm tihin Centre chuan Supreme Court ah urgent application thehlutin ramin Financial Action Task Force (FATF) a kalpui mekah Mishra chu mamawh a ni, a ti a. Hei vang hian ED chief a nihna \um thum kum nga chhunga pawhseisak tawh chu October 15 thlenga a hun pawhsei sak turin a ngen a ni.
Court chuan ‘thil pangngai’ chu ni se sorkar ngenna chu a ngai pawimawh hauh lovanga a bik takin Mishra chu ED Director a chelh chhunzawm zel chu dan kalh a lo tih tawh thu sawiin Sepcial Bench, Justice B.R. Gavai kaihhruai chuan September thla laihawl thlenga a hna a chelh chhunzawm a remti ta a ni.
Bench, Justices Vikram Nath leh Sanjay Karol pawh telna chuan Mishra hun pawhseisak leh chu a remti tawh dawn lo tia sawiin Mishra an ED director nihna a chelh chu September 15-16 zanlai a\angin a tawp ang, tiin a sawi a.
Ngaihtuahna neihnaah Justice Gavai chuan sorkar aiawha ding Solicitor General Tushar Mehta chu zawhna na tak a zawt a.
“He pa tih loh hi in department pumah laktlak in awm lo tihna em ni. Force pumpui tan mi pakhat chauh he pa hi a tel lo a nih chuan department pum a tluchhe dawn tihna em ni,” tiin Justice Gavai chuan zawhna a siam hial a ni.
Justice Gavai chuan court chuan July 11-a judgement kan siam ni a\angin he pa hian ED Director hna a chelh chhunzawm kan phal lo thei a ti a. “Thuneihna inhlanchhawn \ha taka a kal theih nan July 31 thleng hun kan pe zawk che u a ni,” tiin Judge chuan a sawi bawk.
Mehta chuan tu te mah hi thlak theih loh an awm lo tia sawi bawkin FATF peer review chu kum nga dana neih a ni, a ti a. “Mishra-an office a luah zui rih chuan he ram theihna bakah international credit ratings, financial arrangement World Bank nena kalpui mek te dinhmun a \ha dawn a. July 11 verdict kha FATF review nen a hun a lo inang chiah a ni,” tiin a sawi thung.
Additional Solicitor General S.V. Raju chuan ram \henkhat India ertute chuan India chu “gray list” a telh an duh a ti a. “FATF compliant ram zingah kan tel tawh a. Heng file te a kimchanga hrefiah tur chuan ED Director thar chuan thlaruk tal hun a duh dawn si a ni,” tiin a sawi.
Hei hi chhang letin Senior advocate A.M. Singhvi, petitioner aiawha ding chuan sorkar ngenna chu July 11 verdict pawmlohna a ni a ti thung a.
“Centre in ram chhung dinhmun mi pakhat kuta awm anga a hmu hi a vanduaithlak a ni. FATF-ah hian ED Director ni lovin Ministry officials, Secretary of Revenue te zawk chu inhnamhnawih an ni” tiin Singhvi chuan a sawi thung a.
Petitioner aiawha ding tho Senior advocate Anoop Chaudhary chuan a hna a chelh chhunzawm zel Apex Court in dan kalh a tih tawh chuan FATF a la buaipui zui zel a nia. “Hei hian ram hmel a tichhe dawn lo em ni? ED Director hi Constitutional machinery a beitham tak a ni. Ram innghahna bur constitutional figurehead angin i chhuah lo teh ang u,” tiin a sawi thung.
Advocate Prashant Bhushan chuan Centre dilna siam hunah zawhna a neih thu a sawi thung a. Mishra hun pawhsei chu ‘thuneihna hmansual nasatna’ tiin a sawi bawk a. “Supreme Court-in he dilna hi a pawm a nih chuan dan awmsa hnualsuatna nasa tak a ni ang,” tiin a sawi thung.