SC in High Court thutlukna siam hnawl

Uttar Pradesh a 17 lakh Madrassa zirlaite tan thawk huaina turin Supreme Court chuan Allahabad high court in UP Board of Madrassa Education Act, 2004 a hnawlsak chu kalpuitir zel turin a ti a. Tihian kum 2004 law hnuaiah UP state a Madrassa 16,000 velte chu a ngai angin an kal leh rih dawn a ni.
Chief Justice of India Dy. Chandrachud bench chuan high court thutlukna siam chu a landan maiah pawh a dik lo tia sawiin UP leh central sorkar bakah Madrassa board te chu notice a pe zui nghal bawk.
High Court chuan thla kalta khan kum 2004 law chu ‘constitution kalh’ tia sawiin principle of secularism a bawhchhia tiin sorkar chu Madrassa zirlai tena formal education system an luh theih nan ruahmanna siam turin a ti zui bawk a ni.
High Court thutlukna chu Supreme Court chuan kalpui rih loh tur tiin Madrassa Board te thil tum chu khuahkhirhna lam a ni a, board awm chuan secularism a khawih lovang a ti a.
“High court in he Act provision te nuaibo a, zirlaite hmun danga chuktuah rem tura a tih hian zirlai nuai 17 vel a khawih dawn a ni. Kan thlir dan chuan zirlaite hmun danga chuktuah rema sawn kual chu \ul lovah kan ngai” tiin Chief Justice chuan a sawi a.
PIL thiltum ber chu Madrassa te chuan secular education pe in core subject mathematics, science, history leh language te an zirtir tel tur a ni ti se chuan Madrassa Act 2004 provision te hi nuaibo a \ulna a awm lovang tiin a sawi bawk.
Central sorkar leh UP sorkar chuan Supreme Court-ah High Court thutlukna chu an pawm thu sawiin sorkar laipui chuan sakhuana leh thil pawimawh dang chingchivet chu inhnial theih tak a ni an ti a.
Senior advocate Abhishek Manu Singhvi, Madrassa aiawh ding chuan religious education chu religious instruction tihna a ni ngawt lo, high court thupek hian Madrassa zirtirtu 10,000 leh zirlai nuai 17 velte chu derthawngin a siam a ni a ti a. Mahse, UP sorkar chuan ruahmanna an siam thu erawh an sawi thung a.
Singhvi chuan Madrassa education chuan quality a nei lo emaw a huapzo lo tia sawi nghawt theih a ni lo tia sawiin Madrassa bik thlurbinga khap chu thleibikna a ni a, Supreme Court pawhin Aruna Roy vs Union of India, 2002 verdict-ah chiang takin a lo sawi tawh tiin a sawi bawk.
Chief Justice chuan July thla chawlhkar hnihnaah ngaihtuah nawn leh tur a ti zui a ni.