Supreme Court chuan Muslim tena an kalpui polygamy leh ‘nikah halala’ te chu constitution kalh a ni tia khap tura ngenna chu five-judge Constitutional Bench dinin a ngaihtuah tur thu a sawi.
Chief Justice D.Y. Chandrachud leh Justice P.S. Narasimha te chuan lawyer Ashwini Upadhyay an petition a theh luhah Constitution Bench hmasaa judge pahnih Justice Indira Banerjee leh Justice Hemant Gupta te chu an chawlh tawh avangin a thara ngaihtuah turin five-judge bench din turin a ti a ni.
-- Advertisement --
“Five-judge bench ngaihtuah tur thil pawimawh tak a awm a ni. Kan din ang a, ngaihtuah a ni ang,” tiin CJI chuan a sawi a. Nikum November 2 pawh khan Upadhyay vek hian a lo sawi chhuak tawh bawk.
Nikum August 30 khan five-judge bench Justices Indira Banerjee, Hemant Gupta, Surya Kant, M.M. Sundresh leh Sudhanshu Dhulia te chuan he PIL chungchangah hian National Human Rights Commission (NHRC), National Commission for Women (NCW) leh National Commission for Minorities (NCM) te chu an ngaihdan sawi turin a lo ti tawh a.
A hnuah lawkah Justice Banerjee leh Justice Gupta te chu September 23 leh October 16 ah an retired zui ta bawk si a, hei vang hian Bench din that leh loh theih loh niin polygamy leh ‘nikah halala’ chungchangah hian petition pariat lai a awm a ni.
Polygamy hian Muslim mipa ten nupui pali an neih a phalsak a, ‘nikah halala’ erawh Muslim hmeichhia a pasal then tawh pasala nei leh duh chuan midang a neih phawta chu chuan a then leh hnuah chauh a pasal then hmasak chu a nei leh thei a ni.
July 2018 daih tawh khan apex court-in a ngaihtuah tan tawh niin Constitution Bench ngaihtuah turin petition he mi kaihhnawih dangte nen a lo ti tawh a ni.