Scho’ pek ran phutin pungkhawm

Scho’ pek ran phutin pungkhawm
Tribal scholarship atana sum awm tawh, tun thlenga zirlaite hnena pek a la nih loh avangin Mizo Zirlai Pawl chuan Thawhlehni khan Dawrpui Vengthara Mizoram Scholarship Board office kawtah a nawrna atan thutkhawm an huaihawt.
MZP Gen. Hqrs. president H Lalthianghlima chuan hetiang ti lo thei loin scholarship buaipuituten an siam tih a sawi a. Tun hi a bul tanna a ni a, tuna lungawilohna lantir hian awmzia a nei lo a nih chuan total bandh huaihawt thlenga hma lak a ngai a nih pawhin an ti hreh dawn lo tih thuneituten lo hria se an duh tih a sawi.
Scholarship hi pekchhuah a la ni chuang lo a nih chuan vawiin – November 15-ah pawh hian MSB office kawta punkhawm leh an tum tih MZP hruaitute chuan an sawi a ni.
Mizoramah MLA inthlan neih a nih lai a nih avanga Scholarship Board-in Election Commission-ah phalna an lak ngai nia an sawi avangin MZP hian Thawhlehni vek khan Mizoram joint chief electoral officer hmuin zirlaite scholarship pekchhuah thuai a tul thu an sawipui a. Chief election commissioner hnenah pawh zirlaite scholarship pek chhuah phalna pe thuai turin ngenna lehkha an thawn a ni.
MZP hruaitute sawi danin, zirlaite scholarship second installment tang zat hi cheng nuai 1787.48 a ni a, sum hi Mizoram sawrkar kutah 2023 September 25 khan a lut tawh a ni.
Scholarship second installment sum la dawnglo hi zirlai 19495 an awm a, Mizorama zirna in 36 atangin zirlai 5023 bakah pawl XI leh XII zirlai 11462 leh Mizoram pawna awm zirlai mi 3010 in an la dawng lo a ni.