School education thuahfai…

Tun hnaiah ‘zirlaite scholarship buaipui thiam lo zirtirtu’ tih thawm kan hre zo chauh a, tunah ‘sikul hming chhiat hlauh avanga sikul hminga exam tura form fill up phalsak an ni lo’ tih thawm hriat tur a lo awm zui leh ta…a lungchhiatthlak hle.
Hemi chungchang hi Mizo Students’ Union General Headquarters Executive Committee Meeting nimina neihah tarlan a ni a. “Kum 2024-25 Academic Session chhunga sikul thenkhatten an naupang thenkhat, zirna lama hnufual deuha an ngaihte, result tha, pass percentage tha duh vang leh sikul hming chhiat hlauh avanga sikul hminga exam tura form fill up phalsak an ni lo” tiin tarlan a ni a. MSU chuan pawi an tih thu leh sawrkar thupek bawhchhiatna, naupang dikna chanvo chhuhsakna, tiin an thuchhuahah an tarlang a ni.
Tunhma atang tawhin ‘quality education’ tih hi sawrkar ten an lo buaipui tawh thin a, ‘world class education’ tih te, ‘education reforms commission’ tihte pawh, chhuang taka sawirik a lo ni tawh thin. A thawm a len ang huin a tak hmuh tur erawh a lian lo thin hle.
School thenkhat, zirtirtu neih tlem avanga zirtirtu ngiat belh nana zirlai nu leh paten lungawilohna lantira sikul khar te hial pawh a lo thleng tawh a. Teaching method/learning method siam that tihte chu kan hlat hle thin a ni.
Tuna zirlai hnufual deuhte mahni sikul kalna hminga exam form fill up ‘phalsak lo’ tih thawm lo ri chhuak leh ta hian, zirtirtute quality bawk a rawn pholang leh a tih theih awm e. An zirlaiten exam an paltlang theih an rin loh avanga exam tir phal loh ringawt kha, a ‘nunrawnthlak’ tia sawi hial tham a ni awm e. Form fill up hnu leh, exam hall-a an thut hun inkarah khan eng ang takin nge zirlaiten tan an lak ve dawn tih pawh hriat a ni lo a, a enga mah hmaa sikul tihmingchhetu tur anga han ngaih ngawt mai kha, a kawnghmang lo hle a ni.
A nihna takah chuan, an zirlaite dinhmun a hniam viau chuan, zirtirtute dinhmun kha a sang viau bik thei lo ang tih a hriat mai a, heti zawnga hma latu zirtirtu/school chuan mahni mawng an hlim mai a ni.
School education chungchanga thil thlen thin dan han en hi chuan, kan school education system hian thuahfai (overhauling) hi chu a mamawh tawh hle niin a lang.