Science Exchange Prog ah Mizo zirlai tel dawn

Last updated Nov 4, 2023 7 0

SCERT Mizoram hmalakna hnuaia State Level Exhibition & Project Competition buatsaiha lawmmman dawngtu C Lalmuanpuia, Baptist Higher Secondary School Lunglei zirlai chu kum 2021-a New Delhi-a national level intihsiak neihah National Award hlan a ni a, November 5 -11 Japana SAKURA Science Exchange Programme-a kal tura thlan a ni.
INSPIRE Awards MANAK hi sawrkar laipui Department of Science & Technology flagship programme pawimawh zing ami a ni a, kum 2009 atang khan kalpui tan a ni. Pawl 6 -10, kum 10 -15 chin tana ruahman a ni.
SAKURA Science Exchange Programme hi Japan Science & Technology Agency-in Japan leh Asia ram dang zirlaite intlawh tawn nana buatsaih a ni a. India atangin INSPIRE Awards Nptional Awardee naupang 59 an kal ang. He programme-ah hian naupangte chu Japan ram science & technology changtlung tak, seminar hmanga kawhhmuh an ni anga, zirna in, industry leh Research Center tlawhpui an ni ang.

NIT leh NIELET-a harsatna en
Mizo Zirlai Pawl (MZP) chuan National Institute of Technology (NIT) leh National Institute of Electronics and Information Technology (NIELIT) chhunga harsatna awm hrang hrang bawhzuiin hma a la.
MZP hian kumin October 26 khan National Institute of Technology (NIT) a teaching staff leh non- teaching staff te harsatna tawh bawhzuiin NIT director Prof. S Sundar an hmu a, advertisement chhuah loa hnalak a nih thu leh sum hman dan dik lo chungchang sawipui a ni. Harsatna awm chinfel a nih theih nan hma la thuai turin an hrilh a, heng harsatna hi an enzui zel dawn tih an sawi.
November 2 khan National Institute of Electronics and Information Technology (NIELIT) Aizawla zirlaite harsatna hrang hrang bawhzuiin NIELIT director in-charge T Gunendra Singh an hmu a, director hi zirlaite harsatna hrang hrang awmte a rang thei ang bera hma la turin MZP chuan an hrilh. Institute-ah inenhranna awm lo tura hma la turin hrilh a ni bawk.
Hei bakah hian zirlaite harsatna sukiang tura MZP-in Students’ Union din tura a ngen angin, director hian November 17 ralhma ngeia din a nih theihna turin notification a tichhuak nghal a. MZP chuan NIELIT zirlaite harsatna enzui zel a tum tih a sawi a ni.