Science leh Arts

Dr Vanlalvenpuia
Assistant Professor
Department of Philosophy
Pachhunga University College

Science leh Arts huangahte hian hriatna chi hnih, in ang lo, mihring tana pawimawh dan inchen si a awm a. Science zirmite chuan khuarel thilte chu tihchhinna leh finfiahna hmanga bih chiangin, a kalphung hrilhfiahna atan theory-te an chher chhuak a. Mihringte awm hma daiha thil awm dante leh kum tam tak hnua leilung leh van arsi awm dan turte chu theory hmangte chuan an hrilhfiah thei. Science hian hriatna rintlak min pek theih chhan nia lang chu, zir dan kalphung mumal tak hmanga theory belhchian dawl a pek theih vang a ni. Chutih laiin Arts zirna huanga theory te chuan mihring hma lam hunte chu a hrilhfiah dik mawh hle thung a. Scientific theory-te angin an hlawhtling an tih ve theih loh. Chu chuan hriatna hniam zawk leh chiang lo zawk anga ngaihna a siam chawk.
Physics, Chemistry leh Biology-ahte chuan khuarel awm dan leh kalphung chu suangtuah dan chikhat- ‘inductive reasoning’ an tih, thil awm fo dan atanga thil awm zel dan tur riruat thiamna hmangin an chhui thin a. Ni awklem hun turte, ruah sur hun turte, thlai kan thar hnem thei dawn em tihte thlengin min chhut tir thei a. Dam khawchhuak thei tura hriatna kan mamawh, hma lam huna thil hlauhawm pumpelh thei tura hriatna min petu a nih avangin, thil rinlawk theihna, predictive power min pe a, an ropuina tak pawh a ni.
Tin, science hriatna lama hmasawnna chuan chiang leh zuala thil chinchang zu hriat belh zelna a kawk tel bawk a. Entir nan: Atom chungchang chu a suangtuahtu hmasate aiin kan hre fiah tawh zawk daih a, leilung chhungril chet vel dante pawh vawiin hian kum zanga kal ta aiin kan hrefiah ta. Mahse, Arts huanga kan hriatna pawimawh ber ber leh hriatna kori tu ber te chuan chian lam aiin zawhna a hring chhuak hnem zawk emaw tih tur a ni. Eng khawtlang kalphung nge dik ber anga tha ber ang? Nau tih tlak hi phal chin siam a tha em? Democracy aiin communism hi a tha zawk em? Hnam hrang hrangte identity hloh si lova lungruala kan chenho nan eng theory nge rintlak ber ang? Hringnun zawhna pawimawh ber ber te hi khawvel hnam tin hian a chhanna hran kan nei emaw tih mai turin ngaihdan a inang thei lo a nih hi.
Science zirna huanga hmasawnna thopa zuana zuan laiin Arts zirna huanga hriatna inbelhkhawm zel erawh hi chuan hma lam a pan kan ti thei meuh lo. Inhnialna tam tak leh ngaihdan inang lo insual vel a hring a. Heti hian ngaihtuah ta ila, hmanlaia kan thihpuite chu tunah chuan a tihdamna kan nei ta a, chak taka hriatna inthleng tawn theihna khawvelah kan awm a, Astrophysics hmasawnna chuan van thengreng chanchin kan hriatnate chu ni tin a zauh zel a, atom laimu chhu phelin, nuclear chakna hai chhuah thiamna khawvelah kan cheng ta. Science hmasawnna hian kan mangphan piah lamah min hruai a ni ber mai. Science-in a taka a thil tum a hlen chhuah laiin Arts huanga hriatnate hian an thil tum a hlen chhuak ve em?
Economic, Political Science, Sociology leh Philosophy a theory hrang hrangte hian khawtlang leh ram lo tidanglam tawh mah se an tum an hlen tak meuh em? Retheihna umbo thei economic theory kan la dap mek a, indona titawp thei political theory chher chhuah hun a va nghah hlel awm em. Hnam, sakhua leh politics lama inlungrualna khawp thudik kan pawm tlan theih hmu chhuak ila chu heti tak hian kan chheh vel ramte pawh an buai lo tur. Arts huanga hriatnate hi pung ve mahse science ang hian hmasawnna a nei kan ti ve thei lo a ni ber mai.
Science ang hian inlungruala pawm tlan theih formula leh theory nei thei ila chu politics leh economy kal fu hleithei lote hi a ziaawm tur. Entirnan: Geometry anga chiangin Arts huanga zawhnate hi chhanna awm se, kan inhnialna te a lo reh ang a, a tha tur. Engtik hunlai emaw khan science hmasawnna anga hmasawntir ve tumin Arts hnuaia zirnate pawh hi tih scientific tumna a lo awm tawh thin reng a. Mithiamte chuan experiment leh verification kalphung, tihchhinna leh finfiah dan phungte chu seng luh an lo tum tawh thin. Social science-ahte chuan scientific taka zirna hmanga kalphung mumal tak, ‘Law of nature’ an tih, Physics zirna a law chi hrang hrang an hai chhuak ang deuh va hmuhchhuah theih an in beisei thin. Mahse tum anga hmasawn a har nachhan ni ber a lang chu, Arts hnuaia zirnate hian mihring mihrinna a hnaih em vang a ni. Economics pawh hi chhiarkawp nen kalkawp viau mah se, sum leh pai che vel zirna ngawt ni loin, duhthlang thei mihringin ei leh bar a zawnna kalphung zirna a nihna laiah science tehfung fir tak a va pha thin lo a ni. Tin, rilru lam zirna pawh hian mihring duhthlanna leh mihring ze mak leh ropui thuk tak mai chu experiment hmanga chhui chhuah mai theih a nih lohzia an hrechiang telh telh emaw a tih theih. Khawih theih leh hmuh theih, finfiah theih khuarel thilte ang lo takin, Philosophy, Literature, History leh Social Science peng hrang hrangte hmasawnna leh tangkaina hi science hmasawnna kan teh anga ve teh chi a ni lo tih hi kan pawm a ngai tlat. Arts huanga zirnate hi chuan kan khawvel thlirna ‘world view’ min pe a, science huang ni lovin, science chhungkhungtu a lo ni zawk.
Kan khawvel thlirna chu engin nge siam le? Arts huanga zirna – Literature, Political Science, History, Education, Philosophy, Psychology leh a dang tam tak hian kan hun tawn mekte hi hun kalta leh hun lo la kal tur thlir chunga hrethiam thei turin min pui a. Khawvel mihring dangte nena kan inanna lai leh kan thawnthu intawm min hrilhfiahin, a hnam ang leh mimal anga khawvel hmachhawn dan tur kan insiamna hmanrua an ni. Hei hi a huhova suangtuahna intawm kan neih, khawthlir sakhat kan neih siamtu chu a ni. Mihring suangtuahna chuan a khawvel chu a hrilhfiah chawp a ngai a, a awmzia a siam chawp chhoh a ngai. Arts huanga zirna hrang hrang tangkhawm chuan khawvel awmze nei, ni tin a vantlang anga khawsa ho thei turin min siam a ni. Mihring thil thlirna chuan a chawrchhuahna khawvel a thuk taka zung a kaih avangin khuarel thil dangte anga va zir ve mai chi a ni ve lo.
Mimal dikna chanvo hi vawn him tlat tur a nihzia leh mipui rorelna, ‘democracy’ vawn him tlat a tul tihna, a huhoa kan khawthlirna inang hi nikhat thil thua lo piang a ni lo va. A chawmtu leh tinungtu chu ‘Zirna In’-te hi an ni. Kan ‘hnam history’- chanchin pawm tlan kan neih theih nan chanchin chhui mi Historian-te thuziak kan zirte chuan kan khawvel thlirna sakhat min siam a. Hetiang a thawthu intawm tlan, thlirna sakhat kan neih pui theih loh te nen chuan indo kan hmabak a ni ringawt mai. Tuna Manipur buaina kal mekah pawh hian sorkarin remna siam leh tura mithiam a rawn te chu University-a Arts huanga zirna Political Science, Sociology, History mithiamte an ni. Kan khawvel thlirna hi chhui nawna thawm that fo a ngai a, khawvel danga an thlirnate nen a khaikhinte a tul thin. Chutiang bihchianna chu ‘philosophical thinking’ kan ti.
Hetianga a pawimawhna hi hriain India rama science zirna chhuanvawr Indian Institute of Technology-ah te chuan Humanities and Social Sciences department lian tak, khawvel huap ang pawh a professor thiam tak tak awmna an din tel zel nia. Heng hnuaiah hian India ram
Engineering leh Science thiam ber tura ngaih te chuan Philosophy, English Literature leh Social Science lamte an zir thin. Science thiamna hi Arts tel lo chuan a famkim lo tih hrechiangtute an ni.
Arts zirna hi thangtharte thlirna siamtu leh thlakthlengtu, a huhoa kan khawvel thlirna siamtu chu a ni a. Tin, Arts chuan Science chu khawhawi lam tur a pe a, science hmanga kan tih theih chin turte a bituk a, thiamna hman hunte, lak sawn hunte, phun hunte, indo puan hun leh remna siam hunte hriatthiam tirtu a ni. Atom laimu chakna hmanga Japan khawpui nawhreh thei bomb hlauhawm siam chhuahna hmanrua chu science ni mah se, Atom bomb thlak kha thil tha ber tur anga ngai a thutlukna siamtuten ngaihtuahna an sen khan, thil tha leh tha lo an ngaihtuah a, kha suangtuahna kha Arts huanga hriatnaa innghat a ni ve thung. Ram leh hnam chanchin tidanglam thei thutlukna atanga ni tina kan mimal nuna kan thutlukna siamte hi science huang an lo ni vek reng reng hlei nem.
Thil pawimawh tak lo lang chu, Science hriatna tehfung hmanga mihring hriatna zawng zawng teh kan tum anih chuan hringnun zawhna pawimawh ber ber kan ngaihthah anga, dikna awmzia pawh kan chhui thiam lovang, a chhan chu scientific method piah lam an ni. Law leh judiciary, dan leh dikna chungchangte phei hi chuan chhiarkawp leh physics ai mah a thluak fim leh laihawl a mamawh zawk hial lo maw a tih theih. Thil tha leh tha lo suangtuahna, morality-te chu awlsam se chu vawiin hian khawvel buaina tam tak leh thil tha lo hi a reh tawh ang chu.
Physics leh Mathematics anga thudik finfiah mai theih pe ve pha lo hriatna dang kan ngaihnep chuan, social leh political theoryte kan ngaihthah ang a, kan innghahna democracy leh liberal philosophy-te chuan ngaihtuah zuitu nei lovin kar lovah a tlu chhia ang a, kan zalenna kan hloh anga a tlem zawkte dinhmun venghimtu philosophy awm lo chuan keini hnam tenaute phei chu kan ral vek ang. Engtin nge mipui maktaduai telte hian khawtlang awmze nei, pan lam nei siam tur hian inlungrualna khawvel, thlirna sakhat kan siam ang tih zawhna chu a bul atanga ngaihtuah that leh vek a ngai ang a. Economy kalphungte a fuh loh chuan science zirna kawl a eng thei mawlh lo ang. Tin, Philosophy leh Literature, mihringin amah leh khawvel a thlirna thuk tak mai a puanna leh a chhuina thu ropuite chu thil chuangtlai emaw kan tih chuan mihring nun hlutna hre loin, dam khawchhuah ringawt kan tum a lo ni ang a, ransa mawl mang ber nen kan inchen lek ang. Chuvang chuan alawm, Science leh Arts huanga zirnate hi ke vei lam leh dinglam ang deuh hi an nih. A pakhat zawk zawk hnufualna hian mihring ke pen dik lo a siam thin.
Heng hriatna pahnihte pawimawh dunzia hi hriain, University leh collegeah pawh National Education Policy kaltlangin, a awm tawk vel hriatna nei kawp ve ve tur hian central lamin ruahmanna an rawn siam chho ta a. Under Graduate kalphung thar chu zawm chho zelin, science lamin Arts an hriat awm tawk, Arts lamin science an hriat awm tawk syllabus-ah chhawp chhuah chhoh a ni mek zel a ni. Science leh Arts huanga zirnate hian pawimawhna inang lo, inchen si an nei a, a khawi zawk zawk pawh hi zir ila inthlauthla thei zawk an awm lo tih i hre reng ang u.