Science leh Mathematics…

MBSE chairman chuan tunhnaia matric result 2024 a chhuah ni khan, zirtirtu indaihlohna a nasat thu leh, arts subject zirtirtuin a theih ang anga inzirchawpa science a zirtir ve nawk nawk a tul chang a awm thu sawiin, naupang hnenah tuina tak tak leh thiamna tak tak nei turin a va pechhuak pha lo, a ti a. Hemi thlak tum hian MBSE chuan hma a la a, mathematics leh science bikah bi-lingual text book an siam a, nikum atangin class IX leh X tan Sap tawng leh Mizo tawngin an dah vek tih a sawi a. Chutih rualin naupangin an chhiar taimak leh taimak loah a innghat ang, a ti bawk a.
Science leh mathematics subject te hi tun hma atang tawha buaipui hlawh reng a ni a, tun thleng hian kan la insingsa fel thei lo. Tuna MBSE chairman-in a sawi ang hian, zirtirtu indaihloh avanga arts subject zirtirtuin science leh mathematics zirtir a tul tlat chhung chuan, science leh mathematics lam tui zirlaite tan chuan an ‘future career’ a tichhe vek thei tihna a ni.
Tuna zirna kan kalpui danah hi chuan, class X thlengin science leh mathematics hi compulsory subject a nih avangin, a tui vak lo leh thiam vak lo tan pawh zir tel vek a ngai a. Matric an pass hnua career tur an thlannaa inhnamhnawih zui tawh lo tur tih hriatsa ngawih ngawih hi matric an tihchhiat phahna emaw, an fail phahna hial emaw a ni thei a ni.
Zirtirtu indaih lo tih reng mai karah hi chuan education hi a quality a sang thei dawn lo reng reng a, MBSE syllabus a ni emaw, CBSE syllabus a ni emaw, zirtirtu an indaih loh miau chuan awmzia a nei thui tak tak dawn lo a ni.
Zirtirtu indaih a pawimawh rualin, zirna kan kalpui dan hi enfiah a, kan dinhmun azira kan inher rem thiam hi a pawimawh hle. ‘Kan dinhmun’ han tih hian, tuna kan zirna kalphung—zirlai talent hrang hrang nei, tihluihnaa duang khata hlum luh vek tumna ang hi, enfiah ngai lai chu a ni awm e. Medical leh engineering emaw, a kaihhnawih lam zir zawm miah lo tur ten science leh mathematics an paltlang a ngai tlat lai te pawh hi, eng tin emawa her rem ngai chu niin a lang.
Education hi, hmantlaka mihring inchherchhuahna a ni, kan tih chuan, chhawr tlak an nihna tur an talent hai chhuah hi thil pawimawh hmasa ber a ni. Vocational education te hi kan uar thiam a pawimawh tawh.