Scotch whisky lei tam ber France khumin India

India chuan France khum tain khawvela Scotch whisky lei tam ber a ni tawh a. Whisky siamtute chuan India ramah whiskey um mtd 219 an thawn lut tiin Scotch Whisky Association (SWA te chuan an sawi.
US chu a hlutna zawnga chhut chuan whiskey leitu lian ber la ni thungin kum 2022 khan $1.27 billion hu an chawlut a, India chu he list ah hian pangana a ni.
Scotch whisky hi India ramah chuan status symbol a ni a, mahse, whiskey market lian ber a ni chungin a share chu 2% chauh a la tling pha.
Man tlawm zawk blended whisky chu Indian consumer tena an thlan ber a ni a. Mahse, tun hnaiah a man to zawk single malt demand a sang chak hle a, hei hi Indians tena sum sen tur an neih tam phah zual tak vanga ngaih a ni.
Khawvel huapa Scotch hralhah India share chu a len zual zel rualin tun hnai kum sawm hnih chhungin India a Scotch thawn luh punna chu 200% chuang a ni bawk a, a la nasa zual zel tura ngaih a ni bawk.
Scotch whisky bottle khatah hian India chuan chhiah 150% a la a, hei hi a chhan chu ram chhunga zu siamtute thlavang a hauhna vang a ni.
SWA chuan India leh UK tena sumdawnna lama thawhhona leh inremna an siam hnuah whisky-a chhiah lak san lutuk hi tihhniam a nih theih an beisei a, nikum October thla khan sumdawnna lama inremna chinfel hman tum an ni zawk a, mahse, tun thlengin thutlukna an la siam fel hlei thei lo a ni.
India leh UK-in inremna siam fel thei se chuan Scotch whisky chu tam zawk India ramah thawn luh a nih theih ngei beisei niin mithiamte chuan kum nga chhungin 1 billion pound hi an thawn luh theih an beisei thu an sawi.
France chu SWA tena India tih loha whisky an thawn luhna ram lian ber niin heng ram pahnih bakah hian Taiwan, Singapore leh China te chu Scotch whisky in tamna ram an ni bawk.
Asia-Pacific region chuan European Union chu whisky hralhna lamah an khum tawh hrim hrim bawk a ni.