C VanlalRuaia
9862569310
-- Advertisement --
A hmasain Bin Laden-a’n World Trade centre a beihna chhan chu “American hian Israel puia Muslim Community an rahbeh vang a ni” tiin an insawifiah a. Thui lutuk kan sawi lo ang a. World Trade center beih atanga a tlan kual dan lo sawi ila.
KHOST: World trade centre bomb kha a bul tumtu leh tih tirtu chu Bin Laden hi a ni a. Thlawhnain an sut ni (11. Sep..2001) chiah khan Al Queda hruaitu tlem te nen Afghanistan khaw pakhat Khost, Pakistan ramri hrul atang hian an news puan CNN/BBC te an thlir a.
KANDAHAR: American sipai ten an rawn zawn tur chu a hriatsa a nih avangin Khost atang hian Afghanistan ram chhim lam pang Kandahar-ah Dt 13 Sep.2001 chuan a tlan lut a. Hetah hian 7.Oct. thleng a awm a ni.
KABUL: October ni 7, 2001 chuan Kandahar atangin Afghanistan khawpui, Kabul a pan ta a. November thla tir atang chuan US fighter-in Kabul an chhu tan ta tak tak a. November 22.2001-ah chuan Kabul atangin Jallalabad a pan leh ta a.
JALALLABAD: U S fighter ten Kabul an Bomb chhiat tak em avangin Afghanistan hmarchhak lam, Himalaya tlang dung thut chhengchhe tak mai leh lungkhawkrawk karah Jallalabad chu dt. 22. Nov. chuan a pan ta a.
TORABORA: Nov 17-12 Dec. 2001 chuan Ram chhengchhe lehzual Jallalabad atanga chhim lam Torabora chu a pan leh ta chuan chuan mai a.
KUNAR: December 2001 thla laihawl vel chuan Himalaya tlangdung sang tak mai leh Ngawpui chhah tak mai Ft 12000 ft (3700 mtrs) a sang, Lung khawkrawk pui pui leh kham pûk tha tak tak awmna chu a pan leh ta a. US sipai lahin thlawhna Fighter/Helicopter in an thleng zung zung mai si a.
PESHWER: US commando leh fighter ten an um zui reng avangin a tan hmun him a awm thei tak tak lo a ni. Awmna ngaia awm reng lah a tan a hlauhawm em em mai bawk si a. Kum 2002 a lo thawt meuh chuan US Commando leh Uifing ten a thawmhnaw hlui te manin chhui hna chu an ngawrh sauh a. Pakistan-ah tlan luh daih chu a him na ber niin a hria. An hual zim tial tial bawk si nen. Ti chuan a Nupui naupang te mai Amal(Yemenese ) pawhin Pakistan-ah chuan a lo hmu thei dawn a ni.
SHANGLA: Kum 2001 tawp lamah chuan a ralti tak zet tawh a. Thingtlang kilkhawr Himalaya tlang kar tlawhchhuah zung zung theih lohna hmun leh mihring tlemna Shangla khua, Pakistan hmar lamah a tlanbo a ni. Mahse US intelligent ten an hre zel si.
HARIPUR: Kum 2003 May thla velah chuan khaw te tak te Islamabad hnaihte, Haripur-ah a insuan lut leh ta a ni. Hmun fianrial lam ai mahin khawpui lam, mi tam naah hmel tidanglama pil bo theih a inring leh ta zawk a. Haripur-ah hian kum 2 vel, 2005 thleng a awm a.
ABBOTABAD: He khua hi chu a zin tawpna hmun, a thih champha vawikhatna May 2nd, kan han ziah chhan kha a ni. Kum 2005 tawp lamah chuan Abbotabad, Pakistan sipai hmunpui, mimir chi tinin an tlawhchhuah mai mai theih lohna hmun intelligent tan pawh hriat chian a har ta riau a. Zawi zawiin van boruak (Radio ariel beaming) lam atanga entlang thlate lain finfiahna chiangkuang tak an neih hnuin an ralrel an ti thlu ta a ni.
SEALs OPERATION: US sipai tha (United Navy Sea, Air and Land (SEAL tia an koh), tui leh van boruak khawmual ah che thiam tak tura ngaih leh training chhuak thlap/zo tawh an ni. A hmasain chhiartu ten in mitthla thiam theihnan Pakistan ram hmar lam hi Himalaya tlangdung khawkrawk tak tak a ni a, Afghanistan ram phei chu Pakistan ram aiin a la chhengche lehzual a. A ram dung zawng hi Himalaya khawkrawk tak takin a tan tlang vek a ni.
A khawthlang zawk Afghanistan Jallalabad-ah chuan Dar 10:30 pm chauh a la ni a. A khawchhak zawk Pakistan Abbotabad-ah chuan Dar11:20 Pm lai a ni tawh a. Jallalabad Us Navy Seal hmun pui lamah chuan sipai ho leh Officer ho pawh zawite tea tawngin chak tak takin an vei sek a, Black Hawk Chopper (Halicopter) tha tak mai pahnihah chuan Navy SEAL ho 23 leh interpreter te chu an thu thap a. Card tereuh te an pai far a, Bin Ladena chhungkua leh an vela awm, a thuihruai leh family dang thlalak leh hrilhfiahna a chuang vek a. Chung Combat zingah chuan Uifing, a hming Cairo, anmahni commando uniform ang rawng hain a tel ve a.
An HQRS Jallalabad (Afghanistan) ah hian Dar 11:30 a ni ta. Black hawk pahnihte chu an thLawk chhuak ta a, Ground hniam tea thlawkin mual hniam leh san ang zelin a chak thei ang berin, an thlawk a. Minutes 15 chhungin Pakistan ramri chu an thleng chho der mai a. Heng Black Hawk pahnihte hi MH60S siam danglam (modified), Pakistan Rader pawhin a man theih loh tura duan a ni. A ri paw a ring lo thei ang ber tura duan a ni. Darkar khat leh a chanve chhungin boruak mel 250, Jallalabad atanga Abbotabad chu an thleng der a ni. Tin an chung sang tak mel 2 aia sangah RQ 170 sentenel Stealth fighter-in a veng reng bawk a ni. Chutih laiin White House lamah chuan Cher nalh tak tak Thing kher kir chet chuat chunga thuin, Defence secretary Robert Gates te, Secretary of State Hillary Clinton te, Expert- Counterterrorism center a, Michael Leister te leh President Barak Obama te leh official tam takin ngawi rengin an thlir taih bawk a.
Dar 11:45 pm a ni tawh ang, Abbotabad khaw hmar thlanglam atang chuan Abbotabad chu an rawn lut a, an tumna tur Bin Laden-a compound chhung phaitual hnim chu hrechiang thawkhata an in ngaih laiin, zan boruak temperature danglam avanga Pressure inthlak chu an hisap piah lam a ni ta. Pressure in thlak dang lam avangin helicopter rihna control chu a pangngai thei tlat lo, chubakah Bin Laden-a compound hungna pal (Fencing) tlangah chuan thir khaidiat (chain) a inbat kual tlat a, chu chuan compound chhung tum luh thuaina tur angle chu a ti zim tlat a. Chubakah bang hungna cement chhah tak chuan helicopter thli pek a lo khuah khawm chuan a rawn chhem let ve tlat a, chu pressure danglam, a angle zim bawk si avang chuan helicopter hnunglam roter chuan a hungna bang chu a hem ta a, chu chuan balance a hlauhtir ta a, pilot chuan ngaituahna hmang vat in Balu lei chhun dup, thlai chinna chu a nawr ta zawk a. Chu veleh Navy Seal te chu an zuang chhuak nghal a, pathum chu pawn bang hungna leh chhunglam in bang inkarah tlan pheiin chenna in pakhat an pawh phei nghal a. An veilam, mikhual thlenna room bula garage chu an pawh phei leh a. Tahchuan Bin Laden-a kaihzavengtu Kuwaiti chuan a Jeep a lo park ve mek a. Metal gate phen atanga a rawn bih phei chu a khabe-ah vawi hnih ngawt kapin a tlu nghal a, a bula a nupui chu a dar dinglamah vawi khat kapin a hliam bawk a.
Chutih lai mek bawk chuan helicopter pa hnihna khan a hmasa zawk chetsual dan a hmuh khan an buai laih a, engkim risk lak a ngai vek tawh an kalchhan chiah (Mission target)a hlawhtling tur a ni, tiin pilot khan tum dan a lo nei hman a. Pakhatnaah chuan Bin Laden inchung zawl lama hruizena inthlak thlak a, chhuk zawnga tum mai. A pahnihnaah chuan hung pawn lam thawl lai, phaitual hnima tum thuai a, fimkhur leh famkim taka tuam chhoh mai chu a remchang zawk ang tiin ground pawnah chuan a tum ta zawk a. SEAL pariat chu an chhuak nghal thawt a. Luh theihna hnai ber gate chu an hal (blash) chhe nghal a. An tlang par par a. A dang palite chuan ground pawn chu an lo veng a. Position an thlak kual pap pap reng a.
Tin Black Hawk hmasa zawk atanga SEAL pathum Kuwaiti te nupa kap hlumtute khan, an piah lawka gate luhna hall hawngin bed room pakhat an pan phei a. An bed room an rawn pawh phei chuan, bed room veilam pangah chuan Abrar-a Kuwaiti unaupa lo ding chu an rawn kap hlum nghal a. Bed room kil lam atanga a nupui Bashra lo hawi phei chiah chu an kap thal leh tawp a. Bomb an pai theih avangin tumah nunga zuah lo tura order an ni. Hetah tak hian SEAL ho hian in leh corridor chung lam kalna hi engti zawngin nge a awm an hai deuh a. In chung lam kalna gate pakhat chu an han hmu leh ta. A lo inkalh tlat mai a, an hal chhe nghal a, SEAL ho chu chhawng hnihnaah an tlan chhova, hetah hian kum 23-a upa Bin Laden-a fapa Khalid chu an kap thal tawp mai a. Hemi bul mai Binl Ladena bed room-ah chuan lut nghalin Chhuar (Shelf) pakhatah AK 47 leh MOKOROV machine pistol, englai pawha a pai reng thin chu an hmu a, mahse an tum ber an la hmu lo.
Bin Laden chu a chhawng chung ber room pakhat rinawm bik (strong room) atana an siamah chuan a security te advice angin a lo inthiar fihlim ve hman ni awm tak a ni. He room hi bang chhah tak, pawn lam atangin silai naran chuan a kah tlang theih loh a ni a. Chhung lam atangin a dah chhuah theih loh bawk a. Tin, he room panna hi kawng pakhat chiah a awm a. Chhung lamah chiah kalhna a awm a. Pawn lam atang chuan hawn ngaihna a awm lo tluk a ni. Mahse Bin Laden hian hei hi a kalh theihnghilh ve leh zel a ni. Chuvang chuan SEAL ho chu an tlang ta puat mai si a. An chhuahchhoh chiah dinglama bed room awm chu an pan nghal a. Chutia a room rawn pan charge authawm rapthlak tak chu a nupui naupang ber awmpui lai Amal (17)chuan hlauhlawp au chungin a pasal lamah chuan a rawn zuang phei a. SEAL room chhunga lut hmasa ber khan, bomb a pai hlauin a silaiin a pir tleng phei dawrh a. An khumah a tlu lut phei chu a chawnah hnung lamin an rawn kap zui a, khum chungah chuan a let tawp mai a. Khum piaha ding Bin Laden pawh chu a hamhaih nge lo beih let chu a tum chuang miah lo; tlanchhiat pawh a tum chuang lo. Second remchang hmasa berah chuan, a luhna ngai chiaha lutin a awmah silaimu pahnih a lut a, a mit veilam chiahah pakhat a lut siah bawk a. An silai kah a nat em avangin a thluak pawh in chunglam ceiling-ah a per bei thawt mai a ni. Churoom chu thisen chuan a bual hneh hle mai. World Trade centre in chhawng lian pahniha mihring nunna, nula nalh tak tak kangral ta te, thlawhna liana mihring nunna hlu tak tak leh America mipui lung chhiatna kum 2001, Sept.11 phuba chu he room chhungah hian a lo tawp ta a ni. World Trade centre bomb tirtu leh mawh phurtu nun chu a tawp ta a ni.
Bin Laden hian Kurta var pan kekawr var pan thawl tak a ha a, Muslim cap lu chhipchhuan ang chiin a inthuam a ni. Ho takin a inthuam a, ralthuam invenna lam engmah a keng lova. Chubakah in luah laiah pawh ralrel lam leh tlanchhuahruk theihna engmah hmuh tur a awm lo a ni. A nupui duh ber Amal (Yemenese) nen chauha awmin American SEAL an lo thawk tih pawh hre lo in, thawm riva satliah deuhah an ngai nge, an zam lutuk hamhaih tih pawh hriat a ni lo. Beih let/thihchilh tumna pawh a awm lo. Muslim ho hi an vaupum a na nge…? Han nanchin tak tak hian, an lo awmho riau zel a, an a ta em ni tih mai tur hian ho deuh hian an lo lang ta thin a. Saddam Hussain te pawh a inhrosak nasat teh reng nen, a lo chhuak ruau mai a, nge a bul thum kan hre thei lo zawk ni.
Ti chuan hlauthawng reng rengin kum 10 vel a tlan chhe kual a, a rin loh deuhin Abottadadah an nangching ta a ni. Martar turin Muslim thalai a fuih a, mahse amah chuan martar a duh der si lo. Mifingin policy an siam a, mimawlin kan rui thin a lo ni. A khawngaihthlak kuang kuang thin khawp mai; ama tehna atanga han thlir pui te chuan a dik ve em em tho mai si a. A fa a kalsan tak hmeltha deuh deuh suahsualna nei lo innocent children han hmuh chuan an khawngaih thlak ve tho mai. Mahse heng mihringte nen kan indo a, kan inbei a, lungngaihna te tuarnate hi ka ngaih dan chuan siamtu mawh vek a ni. Charles Darwin-an ‘Survival of the Fittest’ a tih hian min bual â ve ni tur a ni.
(Ref. Peter Bergen: Adopted from Manhant. Time Vol.179.No18. 2012)