Sean Kingston leh a nuin sum leh paia inbumnaah thiam loh chang
December 2023-a Aizawl-a rawn concert mihang zaithiam Sean Kingston leh a nu te chuan sum inthawn kual velnaa inbumnaah thiam loh changin, July ni 11-ah a hremna tur an puang dawn a, hetiang thubuaia thiam loh chang te hrem theihna na berah chuan kum 20 thleng lung in tan tir theih an ni.
‘Beautiful Girl’ hla avanga khawvelin a hmelhriat Sean Kingston, a hming tak Kisean Anderson leh a nu Janice Turner te chu sum inthawn velaa inbumnaa an puhna hrang hrang pangaah thiam loh chantir vek an ni a, he inbumnaah hian dollar maktaduai chuang tipelhe a puh an ni.
He case hi Florida-ah ni nga chhung an ngaihtuah hnuah jury ten Kingston leh a nu te chu thiam loh chantirin, convict an nia, engtin nge an hrem dawn tih chu July ni 11-ah an puang leh dawn a ni. Kingston, kum 33, hi house arrest a dah niin, electronic monitor bun tir a ni a, a chenna in atan dollar 5,00,000 bond leh dollar 2,00,000 a sum faia dah tura tih niin, Janice Turner, kum 62, chu thuneitu ten kawlin, hremna tur an puan hma chu an kawl zui dawn a ni.
Kingston leh a nu te hi jewelry business, luxury bed company, car dealership leh TV installation company te bum kualna thubuaiah thiam loh chantir an ni a, prosecutor te chuan an sum tih chingpen hi dollar maktaduai chuang niin an sawi a, March 2024-a e inbumna an hriatchhuah hma kum eng emaw chen chu hetiang inbumna hi an lo kalpui tawh niin an tarlang bawk. Kingston leh a nu te hi May 2024 khan man ni a, nikum July khan a vawi khat nan court-ah an inlan a ni.
Kingston hi tleirawl tein rimawi khawvelah a hming a rawn chher a, a hla ‘Beautiful Girls’ chu Billboard Hot 100 (singles) chart-ah 2007 khan No.1 a kai a, hei hian rimawi khawvelah a rawn vawrh lar ta a ni. A album tharlam ber chu 2022-a a tlangzarh ‘Road to Deliverance’ kha a ni.
Sean Kingston leh a nuin sum leh paia inbumnaah thiam loh chang
Get real time updates directly on you device, subscribe now.