Season tawpa chhuak tur Messi

Season tawpa chhuak tur Messi
Argentina forward Lionel Messi chuan season kal lai tawp rual hian Paris St-Germain a chhuahsan dawn tih nemngheh a ni ta!
He thu hi Spanish football writer rintlak ber zinga mi Guillem Balague-a sawichhuah niin, season liamtaa PSG tana Ligue 1 title laksaktu Messi hian kumin nipui thawt lai hian Paris-a a contract neih lai a hmangzo tawh dawn a, inremna thar ziak loin chhuah a thlang ta zawk a; tun dinhmunah a kalna tur la chiang lo mah se a club hlui Barcelona bakah tunhnaia club thuneitute thu loa a zinchhuah vanga hremna a tawh phahna ram Saudi Arabia nen thuk taka sawizawm a ni mek.
Argentine World Cup winner hian a thuphugn chuan kum khat dang PSG-a cham zui leh a remti tih thu a richhuak hman zet a, mahse, club leh player lam hian contract thar ziah lam an hawi zui ta lo a ni.
Balague sawi danin, Messi hian a han ngaihtuah vang vang a, a khelh mekna club chuan sum khuahkhirhna avanga harsatna an tawh bawk avangin European game-ah level sang ber an khel pha chiah loin a ngai a, French champion hlun hian an awh ber Champions League an lak mai theih rih tlat loh avangin young talent lam tihpun an ngaipawimawh chho ta bawk nen Argentine pawhin Europe top level football khelhna hmuna kirleh a thlang ta zawk niin a sawi.
Messi hian kum 2021 khan kum hnih chhung atan Paris-ah contract a ziak a, an inremna lehkhaah pawl pahnihin an remtih dun chuan kum khat dang contract pawhsei theih a ni ang tih a ni a, mahse, chu duhthlan theihna chu an tinung dawn ta lo a ni.
An chhuah tur thu hi chawlhkar tam vak lo liamta daih tawh khan a pa Jorge Messi chuan Paris St-Germain football advisor Luis Campos a hriattir daih tawh nghe nghe.
Messi chhuah duh chhan nia football ziaktuin a tarlan danin, player hian Financial Fair Play rules avanga PSG budget a thlir a, season thar atan khamkhawp a ni dawn ta loah ngaiin, chu chuan squad ‘quality’ tiderthawng turah a ngai a, an that ber lai pawha Europe club trophy lian ber ban pha tlat lo an nih laia hetiang harsatna an tawh zui leh zel chuan Europe inelna sang berah beisei a nei sang ngam ta lo a ni.
Tarlan tawh thin angin, kum 35 hi Thawhlehni mai khan club phalna la loin Saudi Arabia ramah a zin a, PSG chuan chawlhkar hnih chhung atan club tana inlan thei lo tur leh training pawh zawm thei lo turin a hrem a, hei hian a chhuah tur tiawihawm lehzuala ngaih a ni.
Barcelona leh Messi Nou Camp-a Argentine forward kirlehna kawng hi an dap ve ve tih hriat a ni a, chutih laiin La Liga hmahruaitu team hian an superstar hruaikirleh turin sum lamah harsatna an tawk mek a, a hun takah he harsatna hi an sukiang zo dawn em a chiang rih lo.
Tun dinhmunah Messi hi Major League Soccer club Inter Miami chuan an ngaihven tih hriat ni bawkin, Saudi Arabia club Al-Hilal pawhin kum khata euro maktaduai 400 (£354m) tehreng hlawh turin an thlem tih thawm a richhuak thar mek bawk.
A kum tam chho ve tawh mah se Messi hian season khat na na na chu European football level sang ber la khelh theih a inbeisei a, a vawingana atana Champions League trophy hawn leh hram a duhna kawnga PSG belh chu awmze nei loah ngaiin Europe club trophy hlu ber tum li ngawt a laksak tawh Barcelona chu innghahna tlakah a la ngai a, Nou Camp-a kirleh lam a awn ta niin Spanish football ziaktuin a tarlang.
Messi hian PSG tan inelna hrang hrangah match 71 atangin goal 31 thun tling tawhin, assist vawi 34 a siamchhuak tling tawh bawk a, season liamta khan Ligue 1 title a lakpui.
Hremna a tawh avangin PSG hmachhawn leh tur game hnihah Troyes leh Ajaccio a hmachhawn thei dawn lo a; tun dinhmunah khelh nga chauh awm tawh chungin a khelhna club hian point ngain league table-ah hma an hruai fal a, season hnuhnung 11 chhunga an league title pakuana tur an beisei leh mek a ni.
Barcelona player awm tawh zawng zawng zinga goal thun hnem ber ni mek Messi hian Catalan team tana game 778-ah goal 672 a khung tling a; a club neihchhun ni kumkhua hi kum 2021 khan Barca sum harsatna avangin a chhuahsan.
Nikum December thla World Cup-a Argentina champion-puitu hian a vawi-riatna atan kumin October thla hian Ballon d’Or a dawn leh rin a ni.