Season tawpa kalbo ve tawh tur Busquets

Season tawpa kalbo ve tawh tur Busquets
Lionel Messi lakluh leh tuma Barcelona-in sum lama kawng an sial chhohna tur chuan hlet a chhuah tan niin a hriat a, an veteran player leh hlawh tam zual zinga mi captain Sergio Busquets pawhin kumin nipui thawt rual hian kum 18 chhung zet a lo vawn tawh Cata-lan club hi a chhuahsan ve tawh dawn!
Busquets hian kum 2005-a Barca a zawm hnuah kum 2008 khan a senior debut a nghak-chhuak a, he thu buatsaih lai thlengin kum 34 mi hian Nou Camp club tan match 718 tehreng a khel tling tawh a, he club chanchina game khel hnem pathumna a ni pha.
Spain midfielder hlui hian Barcelona tan pawh hlawhtlinna a chhawpsak hnem tawh na rawh a, a trophy hawn tawh zingah La Liga title pariat, Spanish Super Cup leh Copa del Rey trophy pasarih ve ve bakah Champions League title pathum a tel.
Chutiang mi chuan a chhuah tur thu nem-nghetin, “Thutlukna awl-sam ni lo mah se tun hi chhuah hun ni ve tawhin ka hria a, zinkawng theihnghilh theih tawh loh tur a ni khawp ang.
“He thuam inbel chung Ieh he stadium-a inkhelh hi englai pawha ka mangphan thin niin, ka tan chuan chawi-mawina a ni a, duhthu-sam leh mahni induh larhna a ni. He badge aiawhtu nih leh humhim zel hi kum tam tak chhung chu ka tinzawn ber a ni ta.
“Engkim hian bul tan hun leh tawp ni a nei vek a, he club-a ka ni hmasaber leh a tawp thlenga ka lungkham ram min thlensaktute zawng zawng chungah lawmthu ka sawi e.”
Tarlan tawh angin, Busquets hian kum 2005 khan youth player ni chungin Barcelona a zawm a; Barca B team lama a kai chhoh hnuin 2008 league game-a Racing Santander a hma-chhawn kha manager Pep Guardiola hnuaia a first-team debut a ni.
He defensive midfiel-der hian European Super Cup leh Club World Cup trophy pathum ve ve Barca tan lakpui tawhin, senior team-a kum 15 a khawsak tlin hnu hian goal 18 leh assist tum 40 a siamchhuak tling tawh.
Nou Camp atanga an captain Busquets input-chhuah ve tawh tur thu an puan rualin Barce-lona chuan an club tana khel tawh zinga player tha berte zinga mi a nih thu an tarlang.
Spain captain hlui hian nikum December thla mai khan international football a chawlhsan a; ram tana a khelh laiin Spain chu 2010 World Cup leh 2012 European Championship-ah a champion-pui.
Tun dinhmunah Xavi Hernandez-a team hian khelh nga la nei chungin La Liga table-ah point 13-in hma an hruaifal mek.