Seat lakna kan thlahthlam dawn lo – Congress president

Seat lakna kan thlahthlam dawn lo
– Congress president
Sinlung Hills Council inthlanah seat khat an lakna chu opposition bial ni dawn mah se, an thlahthlam dawn lo tih Congress president Lal Thanzara chuan a sawi.
MPCC president hian thuchah tichhuakin, Sinlung Hills Council (SHC) inthlanah an beisei ang result nei pha lo mah se, an party-in hmasawnna nasa tak a nei a, an lawm takzet tih a sawi. ‘A bikin Khawlian biala voter-te chungah kan candidate Pu Lalrawngbawla in thlantlin avangin lawmthu ka sawi a, opposition bial ni dawn mah ula, kan thlahthlam dawn lo tih hria ula ka duh,” a ti.
SHC bial 12 zinga bial 8 chu MNF MLA nilai bial niin, a bak bial 4 chu ruling party ZPM MLA bial an ni tih Lal Thanzara hian sawiin, ZPM leh HPC thawkdunin MNF leh HPC (R) an thawkdun a. Hetiang karah thawhpui nei loa Congress an mal din chung a, bial hrang hranga Congress candidate-te vote hmuh 2023 MLA inthlan aia hmasawnna nasa tak lang chu lawmawm a tih thu a sawi bawk.
‘Congress-in seat khat chauh la mah ila, kan vote share a hniam lo hle. Bial thumah pahnihna kan nih bakah vote tlemte in kan tla a. Hei hian hma kan sawn zia a tilang,’ MPCC president hian a ti a. SHC inthlan hi Congress chak zual zel nana rahbi pawimawh a ni dawn tih a sawi a ni.
An party candidate zawng zawng hnenah leh party mi thahnemngai taka thawktute chungah leh inthlan buaipuitu official-te chungah lawmthu a sawi tih a sawi a. SHC-a MNF sawrkar thar tur a lawmpui a, duhsakna a hlan tih a sawi.