Second 30 chhunga chuks tam record siam

I nupui emaw i bialnu emaw kha second 30 chhungin vawi eng zat ngei chuks hman? Brazilian Renato Bayma Gaia chuan bialnu Naiara Roberta de Marins chu second 30 chhungin vawi 195 a chuks hman a, Guinness World Records an siam.
Renato, kum 32m leh Naiara, kum 33, te hi kum khat leh a chanve vel an inkawp tawh a, an pahnih hian doctor an ni ve ve a, an pahnih hian Guinness World Record siam awm tak ‘khawvela couple duhawm ber’ ni a an inngaih avanga record siam tuma che ta niin an insawi.
Renato hian a football team tan em em So Jos E.C. jersey ain, a bialnu Naiara biangah rang tawkin a chuks ka mawlh mawlh a, Naiara lahin nui sâng chungin chuk rem turin a biang a lo dawh ve ngar ngar bawk a. Second 30 chhungin Renato hian Naiara biangah hian vawi 195 a chuks hman a, Guinness World Record, second 30 chhunga inchuks hnem ber record an siam ta a ni.
Renato hi taekwondo black belt a ni a, mahse, a taekwondo thiamna hian bialnu te biang chuks ran lamah a pui kher lo mai thei! Record pawh a vawi khat siamna a ni tawh bik lo a, lehkha bu 10 a chhawng zawnga rem a ti tlu leh rang ber record te pawh a lo siam ve ngat tawh!
Renato chuan, “Bone marrow donor ka ni a, ADHD (attention deficit hyperactivity disorder) nei ka ni bawk a, ADHD nei te hian kan duh zawng chu kan ti thei ve vek tih entir ka duh bawk a ni,” a ti a, hei bakah hian Brazilian tam zawkin Guinness World Records siam tumna an neih theih nana chophur nana a tih niin a sawi bawk.