Secular Alliance-ah party pathum an awm tawh

Secular Alliance-ah party pathum an awm tawh
Mizorama Congress party bul tan, Mizoram Secular Alliance-ah political party pathum an awm tawh a, inthlana thawh ho erawh an la sawi thleng lo thung.
Mizoram Secular Alliance hian Ningani khan thawhhona bul tan a nih thu hi puangin, MPCC general secretary John Siamkunga chuan, sakhaw zalenna tungding zel turin BJP rorelna paihthlak a ngai a, chu chu he thawhhona in a tum ber chu a ni, tiin, tun thlengin he thawhhona turah hian People’s Conference party leh Zoram Nationalist Party-in an rawn zawm tawh tih a sawi. Thawkho party-te hi an inhmukhawm anga, kal zel dan tur pawh an la ruahman dawn tih a sawi bawk.
PC senior vice president Lalrinzuala Chawngthu chuan he thawhhonaah hian ZPM leh MNF pawh tel ngei turin an sawm tih a sawi a. MNF president Pu Zoramthanga’n BJP leh a thawhpui NDA-ah chuan ‘issue based’ in an tel tih a lo sawi tawh angin, tuna Zofate leh Kristiante laka BJP rorel dan chu ‘issue’ lian tak tling a, MP pahnihten NDA rorel dan duh loa an chetdan pawh a fakawm a, hei vang hian Secular Alliance hi an zawm ngei a ring tih a sawi a. ZPM pawh an chief ministerial candidate Pu Lalduhoma leh hruaitu dangten BJP thawhpui anga sawi an nihin, an thawhpui loh zia an sawi thin a, chuvangin BJP rorelna paihthla turin an lo tel ve ngei a ring tih a sawi.
Citizenship Amendment Bill, Uniform Civil Code leh Forest Conservation Amendment Bill ah chauh pawh BJP rorel dan chu Mizote leh Kristiante tan chuan dan pawi tak vek a tling tih John Siamkunga chuan a sawi a. India ram context-ah chuan ‘secular’ tih chu ‘sakhaw zalenna’ a ni a. Hei hi Hindu sakhaw vawrh len tum BJP-in chhutchhiat an tum ta ngar ngar tih a sawi. “Chutiang dan laka kan fihlim theihna tur chuan BJP leh a thurualpui party ni lo kan thlantlin a, he dan hi kan thiah a ngai,” a ti.