Sem culture hnawl turin PM-in ngen

Prime Minister Narendra Modi chuan Karnataka Assembly inthana virtual mode a campaign a neihah BJP worker te chu “revdi culture” (a thlawna thilsem) hnawl turin a ngen.
PM Modi chuan Congress te chu an hun a tawp tawh tiin a sawi bawkin an ‘guarantees’ te chuan awmzia a nei lo a ti.
Karnataka inthlanah hian Congress te chuan an tling a nih chuan in tinah free power 200 units, BPL chhungkua tan rice 10 kg, chhungkaw nu ber tan thla tin puihna Rs 2,000, thalai graduate tinte tan thla tin Rs 3,000 leh diploma nei kum 18-25 tan thla tin Rs 1,500 pek an tiam a ni.
PM Modi chuan state chu a thlawna thil sem vangin leiba in a chiahpiah tia sawiin chutiang ngawtin sorkar kalpui zel theih a ni lo a ti bawk a.
“Kan ramah hian political party ten thuneihna an chan theih nan leh an eiruk theih nan engkim mai an tiam thin a. Heng party te hian ram hma lam hun an ngaihtuah lo, Karnataka thangthar zelte hma lam hun an ngaihtuah lo,” tiin PM Modi chuan a sawi.
“Hetiang hian ram a kalpui reng theih loh a. Sorkar chuan hma lam hun mai bakah tun hun hi a ngaihtuah tel a ngai a ni. Ni tin mamawh phuhruk nan chauh sorkar kalpui theih a ni lo, asset siam a ngai a, tichung chuan chhungtin ten kum sawm tam an intungnung thei dawn a ni” tiin BJP worker te nena inkawmna an neihah a sawi bawk.
PM Modi chuan BJP te chuan shortcut an la ve ngai lo tia sawiin developed India a awm theih nan physical, digital leh social infrastructure lamah investment an kalpui tia sawiin FDI (Foreign Direct Investment) a sawifiah dan dang pawh ‘First Develop India’ tih a ni tiin a sawi bawk a.
“BJP te chuan an rorel kum nga chauh an ngaihtuah lo va, ram a ni a ngaihtuah zawk ni. Party kan ngaihtuah lo va, ram kan ngaihtuah a ni. Tuna electoral politics chauh kan ngaihtuah lo va, kum 25 lo la awm tura India dinhmun tur enge tih chu kan chhut zawk,” tiin PM Modi chuan a sawi.