Semi-final 1 ; France vs Spain

World Cup 2026 a semi-final hmasak ber chu zanin zanlai (Naktuk zing lam) dar 12:30-ah khelh tan a ni dawn a. Champion tura rinkai leh inelna neih meka chetha pahnih France leh Spain te AT&T Stadium-ah an inhmachhawn dawn.
An kalkawng:
World Cup 2026-ah player nei hrawl ber ang hiala ngaih France hi Group I ah an awm a, group harsa ber ang hiala ngaiha awm ni bawk mah se dang zo an awm lova, an chak vek. 3-1 a Senegal an hneh hnuin 3-0 in Irag an hneh zui leh. Vawi hnih an chak zawn hnuin group match hnuhnung berah Norway chu 4-1 in an hneh zui leh a, point 9 hmuin group champion an ni a, last 32 an inhlangkai.
Last 32-ah an khel tha chhunzawm a, 3-0 in Sweden an sawp. Last 16-ah 1-0 a Paraguay an hneh hnuin quarter-final ah inelna neih meka khel tha tak Morocco an hmachhawn. Morocco hi an hneh ve leh viau a, 2-0 a chakin semi-final an inhlangkai. Semi-final-ah Spain hmachhawnin fiahna hautak zet an hmachhawn zui dawn.
France hian semi-final an luh thlengin an khingpuite lakah goal 16 ngawt an thun a, goal hnih chiah an chhuah. Hei hian team tha an nihzia a lantir. An tlarhma ten goal an thun thei a, an midfielder te an tha tawk a, an tlarhnung pawh a phui tha viau tihna a ni.
Euro 2024 champion leh World Cup 2026-ah champion tura rinkai ber pawl Spain hi Group H-ah an awm ve thung a, group champion an ni. Cape Verde nen 0-0 a inhnehtawkin beisei phak lo takin bul an tan. Beisei phak lo takin bul tan bawk mah se an match hnihnaah an insiamtha nghal a, 4-0 ngawtin Saudi Arabia an sawp. Group match hnuhnung berah 1-0 in Uruguay an hneh zui leh bawk. Last 32-ah Group J-a pahnihna Austria chu 3-0 in an hneh a, last 16-ah khingpui hautak tak neiin champion tura rinkai leh boruak nei lian Portugal chu 1-0 a hnehin quarter-final an lut. Quarter-final-ah a vawi khat nan goal chhuah mah se 2-1 in hnehna an chang a, semi-final an inhlangkai.
Spain hian semi-final an luh thlengin an khingpuite lakah goal 11 an thun a, goal khat chiah an chhuah. France ang bawkin Spain hian goal an thun thei a, an tlarhnung a phu bawk. Spain hi midfielder nei tha ber ang hiala ngaih an ni tel bawk.
Head to head
France leh Spain te hi inelna hrang hrangah vawi 38 zet an inhmachhawn tawh a, team inhrechiang tak an ni. An inkarah vawi 18 hnehna chang tawh Spain an chungnung hret a, vawi 7 an inhnehtawk tawh bakah France in vawi 13 hnehna an chang tawh bawk. World Cup-ah vawi khat chiah an la intum a, WC 2006 last-ah intumin, France in 3-1 in hnehna an chang.
Spain hian player nei tha tak France hi tunhnaiah an ngam viau a, an intum hnuhnung vawi hnih; UEFA Nations League semi-final 2025 leh Euro 2024 semi-final-ahte an hneh ve ve. Semi-final-ah a zawna a vawi thum nan an intum leh dawn a ni a, Spain in hnehna changin lungthu kim law law an tum ang a. France in hnehna chang ve tawhin phuba lak an tum ve thung ang.
France hian World Cup an ngam viau a, Euro aiin awlsam an ti zawk. Hei vang hian Spain hneh thei ngei turah an inngai. Belgium an hneh hnu lawk khan Spain head coach Luis de le Fuente chuan France chungchang a sawi a. “Min tum dawn tih an hriatin an lungngai tih ka hria. Vawi hnih chak zawk tawh kan ni a, kan chak leh keuh mai ang,” a ti.