Serchhip-ah changel sawngbawlna din
Serchhip Zuangleng rama din changel kawr sawngbawlna Common Facility Centre chu Nilaini khan chief minister Lalduhoma’n a hawng.
Sawrkar laipui Ministry of DoNER PM-DevINE sum hmanga, North East Centre for Technology Application and Reach (NECTAR) in a din a ni a. Chief minister chuan Zuangleng ram leh a chhehvelah hian changel a tam a, Khumtung leh a chhehvel khuaah balhla chingtu tam tak an awm bawk a. Hengte behchhan deuh hian NECTAR-in changel kawr sawngbawlna a din tih sawiin, helaia ram nei, changel leh balhla kawr paih mai mai thinten an hnawm kha sumah an chantir thei dawn tih a sawi a ni.
Common Facility Centre hi changel kawr atanga hrui siamna, kuta siam paper siamna, vermicompost siamna leh savun thlakna – ‘vegan leather’ an tih mai siam chhuah theihna tura duan ni a. A buaipuitu NECTAR hi sawrkar laipui Department of Science & Technology hnuaia autonomous institution a ni. Zuangleng CFC enkawl tur hian APRINS Guwahati thlan an ni.
NECTAR hian India hmarchhakah technology thar leh tunlai zawk hmanga thingtlang loneitute tanpui hna an thawk thin a, Mizoramah pawh hmalakna tam tham tak an nei a ni.
CFC hawnna hi Agriculture minister PC Vanlalruata leh North Eastern Council secretary Satinder Kumar Bhalla ten an hmanpui