Serchhip district hmun 4-ah plastic lam chi hman an khap

Serchhip district chhunga khualzinte tlawh zin (tourist site) hmun pali – Vety Farm Dilpui, Vantawng Khawhthla, Tuirihiau leh Golf Course & Resort hmunah tawihthei lo plastic bawlhhlawh (single-use) hman khap a ni a. He khapna tha taka kenkawh zui dan tur sawihoin Thawhtanni khan bawrhsap Paul L Khuma hoin a kaihhnawih sawrkar hotute, village council leh YMA branch aiawh an thukhawm.
Bawrhsap chuan, sawrkarin bawlhlawh khuahkhirh leh sawngbawl dan a ngaipawimawh a, felfai leh hrisel taka heng hmunhma hi vawn a nih theihna turin mipui, khawtlang hruaitute leh sawrkar tanrual a tul tih a sawi.
Khualzin tlawh zin hmun hoa vawi khat hmana paih nghal chi plastic hman leh zawrh a nih lohna tura a bawhzui dan tur pawh rel a ni a. Heng hmun pali hi single-use plastics free zone-a puan, dan kenkawh dan tur leh dan bawhchhiate hremna tur, mipuiin an hriat tur tarlanna (hoarding) siam dan tur, July thla chhunga hmalakna tur sawiho niin, chak taka bawhzui tum a ni.