Serchhip Hospital sak tan thuai tum

Serchhip District Hospital building thar sak bul tan dan tur ngaihtuahin Zirtawpni khan district bawrhsap Paul L Khuma hoin thutkhawm a ni.
Hospital design enhoin mipui tan leh hospital tana tha ber turin a tul anga her rem theih a nih dan sawi a ni a. Serchhip mipui, khawtlang hruaitute leh department pawhin he hospital sak bul tan thuai an nghahhlelh thu sawi a ni. Bialtu MLA, chief minister Lalduhoma remtihnain a tira sak dan tur ruahman aia changtlung zawkin building design hi duan a ni a, a rang thei ang berin hospital sak tan dan zawn nise, an ti.
Serchhip District Hospital building thar sakna tur sum hi Power Grid Corporation of India Limited (PGCIL) corporate social responsibility (CSR) fund atanga hmuh a ni a. He project hian a ruhrel dinna bakah hmanraw leina tur sum thahnem tak a kengtel. Inremna thuthlung (MoU) hi 2022 May 27 khan Mizoram sawrkar leh PGCIL ten an ziak a. A satu atan hian Mizoram State Works Advisory Board chuan Zamzo Engineering Construction and Consultancy Aizawl a thlang a. Hospital building hlui hi thiah zawh a ni tawh.
Thutkhawmah hian district administration, Health & Medical Education, Serchhip District Hospital leh CMO hotute, P&E leh PHE, Serchhip Town Development Committee, Serchhip NGO Coordination Committee, Serchhip Joint Action Committee aiawh leh a satu tur contractor an tel.