Serchhipah 3D dental laboratory din

PM DevINE sum atanga din, 3D Dental Laboratory chu Thawhlehni khan Serchhipah chief minister Lalduhoma’n a hawng.
He laboratory hi Serchhip District Hospital-a dah tur a ni a. District Hospital hi sak thar mek a nih avangin 5G internet service awmna Govt Serchhip College-ah bun rih a ni. Hemi rual hian District Hospital-ah mobile ECG device leh drip monitoring system pawh hawn a ni a. Hei hi Serchhip bialtu MLA Lalduhoma’n chief minister a nih hmaa hma a lo lak tan tawhna an ni.
Chief minister hian he ruahmanna a hlawhtlin theih nana thawktute chungah lawmthu a sawi a. 3D dental laboratory chuan ha siam tur neite tan awlsamna nasa tak a pe dawn tih sawiin, he laboratory hi hmarchhak state tinah dah thar vek a ni a, AMTRON-in Guwahati atangin an thlungkhawm ang a, training pawh an ni hian an rawn buatsaih dawn tih a sawi.
“He hmasawnna thar hi Industrial Revolution 4.0 an tih huang ami, 5G connectivity service leh 3D printing technology huang ami a ni a. A changkang em em a, a che rang bawk. Ka bialah ngei kan hawng hmasa thei hi ka lawm hle a; 5G high speed internet hmanga telemedicines hmalakna dang pawh kan ngaihtuah chho zel dawn a ni,” a ti.
Chief minister hian Serchhip District Hospital building tur sak mek a tlawh tih sawiin, PGCIL-in an CSR cheng vaibelchhe 21 an pek bakah sawrkar laipuiin a phal chin vbch.50 an pek belh nen, vbch. 71-in District Hospital thar tha tak neih an beisei tih a sawi.
Tunhnai khan NEC digital tourism project hnuaiah Serchhip thalai 15 chu IHM Delhi-ah ni 45 chhung hospitality sector training pek an ni a. Chu’ng mite hnenah chuan chief minister hian certificate a hlan nghal a ni.