Sericulture lamah Mizoram dah sang

Sericulture lamah Mizoram dah sang
Union minister of Textiles Giriraj Singh chuan sericulture kaihhnawihah Mizoram-in theihna sang tak a nei a, mipui tam zawk tur tir turin chhungkaw thlan bik chu ‘micro model’ atan hman a that a ring tih a sawi.
Pathianni khan Textiles minister hian ni hnih cham turin Mizoram a rawn thleng a. Chief minister Lalduhoma leh Sericulture minister Lalthansanga bakah Sericulture department hotuten Lengpui Airport-ah an lo dawngsawng. Sericulture kaihhnawih silk leh textile lama hmasawnna tur leh thingtlang lamin eizawnna ngelnghet atana an hman theih dan tur, handloom industry tih changtlun dan tur an sawiho a. Lok Bhavan-ah a bik takin Sericulture, Cooperation leh Agriculture & Farmer’s Welfare department hotute bakah Eastern Zone Weavers’ Service Centre leh Development Commissioner for Handlooms office hotute nen an inkawm leh bawk.
Cooperation commissioner & secretary Udit Prakash Rai leh Sericulture secretary Florence Zotluangpuii te chuan “Mizoram’s Sericulture Potential at a Glance” tih hmangin thu an sawi a. Tuna Mizoram textile dinhmun leh kum 2047 thlenga an hmachhawp chu powerpoint hmangin an sawifiah. Agriculture joint director R Lalramhluni pawhin an department hmalakna leh hmachhawp a hrilhfiah a. Development Commissioner for Handlooms office leh Eastern Zone Weavers’ Service Centre, Ministry of Textiles official-te pawhin powerpoint hmangin hmalakna leh hmachhawp an sawifiah bawk.
Union minister chuan Mizoram-in sericulture leh fibre behchhan industry lama hma la turin theihna a nei tha a, khua leh chhungkaw thlan bik hmangin la tha zawk dehchhuah kawngah bul tan pui a, eizawnna ngelnghet atan leh tam tham zawka dekchhuak turin mipui nawlpui tana entawn tur siam dan ruahman a tul tih a sawi.
Hemi atana kuthnathawktute rin ngam nihna turin an thil thar dehralna tur rintlak siamsak a ngai a, chhawmdawlna pekte pawh hralhna tur siamsak dan dap tel sak nghal a tul a nih pawhin, chuti zawnga ngaihtuahna seng turin department hotute chu a chah bawk.
Tunlaia tih lar leh hman tlanglawn – Ramie leh linen chu Mizoramah pawh hma lak tha a tih thu Giriraj Singh hian sawiin, chumi atan chuan Agriculture department nen pilot project kalpui dan dap a tum tih a sawi a ni.
Thil dehchhuah tih lar leh hralhna kawnga kawng zau zawk hawng turin Mizoram leh hmarchhak hmunah ngei buyer-seller meet huaihawt a tul tih sawiin, silk thar tam turin thalai, a bikin hmeichhiate hman tangkai thiam an ngai tih a sawi.
Union minister hian Pathianni vek khan Tlangnuama Zozia Silk & Handloom leh Kulikawn Venga Lapar a tlawh a. Zozia hi silk hmanga puantahtu lar niin, kum 1992 khan din a ni. Union Textiles Ministry hnuaia Development Commissioner for Handloom chuan National Merit Certificate a lo hlan tawh a ni.
Lapar Kulikawn hian puanthui leh puantah kawngah nasa taka hma la in, Mizo hnam incheina chawilar kawngah tha an thawh nasa a. Heng hmun hi Textiles minister hian tlawhin, Mizoram sawrkar official-ten an tawiawm a. Thawktute nen an inkawm a ni.
Union Textile minister hi Central Silk Board hotuten an rawn tawiawm a ni.