Serthlum

Thlasik rim a rawn nam ve leh tan dawn ta a, thlasik thei zinga kan ei nasat ber pawl chu serthlum hi a ni awm e, calorie a pai tlem a, vun tan a tha a, nervous system a tichak a, digestive system tan a tha bawk, heng bakah hian natna chi hrang hrang risk a tihniam thei bawk. Tun tumah hian diettitian/nutritionist, Akola-i’n serthlum ei a thatna ni a a sawite kan rawn tarlang e.
1. Vitamin C kan hmuh theihna tha tak a ni. Kan taksa hian ama tawkin vitamin C hi a siam thei lo va, mahse, vitamin C chu kan taksa tan a pawimawh si a, chuvangin kan chawi atanga kan lakluh a pawimawh ta a ni. Vitamin C chuan ruhseh (arthritis) avanga na te a tiziaawm thei a, tihrawl inhliam tur a veng thei a, lung (heart) natna chi hrang hrang risk a tihniam thei bawk. Serthlum hi vitamin C a paihnem bakah nutrient dang vitamin B9, vitamin A, calcium leh potassium te a pai hnem bawk.
2. Serthlum chu fiber paihnem chaw an tih zinga mi a ni a, hetiang fiber pai hnem chi te hian natural sugar-fructose content an neih avangin chaw eikham a blood sugar level sang tur a tiziaawm thei. Hetiang a nih avang hian serthlum hi zunthlum neite tan a tha hle a, ek khal leh kawtha lo te pawh a veng thei.
3. Fiber a pai hnem avangin cancer thlen thei chemical kan rilpui (colon) atangin a tikiang thei. Hei bakah hian a vitamin C pai hian taksain natna a dolet theihna a tichak a, cancer cell a do chak phah thei a, antioxidant a pai te chu hnute cancer, vun cancer, pum cance leh chuap cancer risk tihniam thei a ni bawk.
4. Vitamin chikhat folic acid a pai hnem a, chu chu chi (sperm) quality tithatu a ni a, folic acid hian chi (sperm) te chu genetic damage awm tur a veng thei bawk.
5. Kan taksa a protein pawimawh tak mai collagen siamchhuah hi vitamin, a bik takin vitamin C hmanga insiam a ni. Collagen chuan sam tissue a phuar nghet a, chuvangin vitamin C tamna serthlum hi sam that nan a pawimawh hle a ni.
6. Kala lungte awm tur a veng thei. Citrus fruits an tih ang chi zingah serthlum hi a tel a, a tui (juice) chuan kan zun pH value a tisang thei a, chu chuan taksa atanga citric compounds paihchhuah a tichak thei a, chuvangin kal (kidney) a calcium oxalate (lungte kan tih mai ho hi) insiam tur a veng ve thei a ni.
7. Thluak tan chaw tha a ni. Vitamin B9 leh folic acid a pai te chu thluak tihrisel a tichak thei an ni. Serthlum-a polyphenils awm chuan thluak a tichak a, thil zirthiam theihna leh chhinchhiah theihna te a tichak thei.