National Games-ah Mizote tan gold hmin belh leh!

National Games-ah Mizote tan gold hmin belh leh!
Taekwondo Male Team Poomsae inelnaah nimin khan Mizoram chuan Services (SSCB) hnehin gold medal a lakbelh leh ta phauh a, taekwondo poomsae tho men’s individual huang atanga Venghlui tlangval Lalthlamuanpuia’n gold a lo lak tawh nen Uttarakhand-a National Games kal mekah Mizoramin gold medal pahnih leh bronze pakhat nen medal tally-ah 27-na a luah chho ve ta!
Pathiannia taekwondo poomsae mipa team inelna kha round tinah poomsae pahnih zel hmanga intihsiak ni a; pre-quarter final chu seeded zawnna’na hman nghal niin, SSCB hnuaia awm Mizoram chu seeded number two an ni a, knock-out round (quarter-final) an inhlangkai.
Last four stage-ah hian seeded number seven Gujarat nen intum lehin, accuracy leh presentation-ah Mizoram a chungnung zawk ve ve a, point 6.732 hmuin Gujarat an hneh ta a ni.
Semi-final lamah hian accuracy tha tak Arunachal Pradesh team nen an inhmachhawn a; Mizoram hian point 6.749 a hmu a, point 0.017 chauha inthlauin Arunachal an hneh zui leh.
Final-ah kum khat chhunga a vawithumna’n Services nen bawk an in tum leh a; an insut hnuhnung pahnihah team tha pahnih hi vawikhat ve ve an chak.
Nimin inkhelah seeded number one SSCB hian 1st poomsae-ah balance an tihchhiat zawk avangin Mizoram an chungnung phawt a; second poomsae-a chetha zawk Services-in point 6.633 hmu mah se Mizoram point (6.700) an phak zawh loh avangin Mizoramin gold medal an la leh ta a ni.
Mizoram men’s team member-te hi Lalthlamuanpuia (Venghlui), H. Vanlalfela (Armed Veng South) leh Daniel Lalhumthanga (Chhinga Veng)-te an ni a; an pathum tangkhawp hian Mizoram tan gold panga la tawhin, kum 2019-a Kathmandu khawpuia South Asian Games-ah khan India aiawha khelin gold medal an lo hawn tawh bawk a ni.