Session atan zawhna 600 chuang lut tawh

Session atan zawhna 600 chuang lut tawh
Assembly Budget Session neih turah tun thlengin minister-te chhan tur zawhna 611 a lut tawh a, heng zinga 557 chu House chhunga tawngkaa chhan chi a ni.
Assembly Secretariat hotute sawi danin, tun thlengin Session atan hian starred question 557 leh ziaka chhan chi – unstarred question 54 a lut tawh a, Resolution 46 a lut tawh. Dan siam tura duan pahnih – Labour, Employment, Skill Development & Entrepreneurship (LESDE) leh Urban development & Poverty Allevation (UD&PA) atangin pakhat ve ve a lut tawh bawk.
Ruahman lawk ang chuan, February 19-a tan tur Budget Session hian March 20 thleng a awh dawn a, chutihrualin a karah chawlh tlazep a tam avangin thutkhawm tak hi chu ni 14 chhung chauh a ni ang. A ni hmasa berah hian larsap-in House a ‘address’ anga, thutkhawm leh hmasak ber February 21-ah larsap thusawi hi House-in a sawiho zui ang.
February 21 hian thutkhawm hnuhnung ber hnulama Parliament/ State Legislative member thi ta sunna House-in a hmang anga, an zingah hian India Prime minister hlui Dr Manmohan Singh pawh a tel dawn a ni.
March 4-ah finance changtu chief minister Lalduhoma’n state annual budget 2025- 2026 a pharh dawn a, sawrkar kum kal mek 2024- 2025 supplementary demand a pharh tel nghal ang. March 10 & 11 aj0 atangin budget pharh tak hi House-ah sawiho a ni anga, March 12 atangin minister-ten an department chana sum hman tur ruahman sa House-in a pawmpui tura pharhin sawiho zui a ni anga, hei hian a kara ni thum chawlh awm tih loh, session tawp ni – March 20 thleng a awh zui tawh dawn a ni.