Sethawn kawng chhia siam

Kolasib district Sethawn chhehvel kawngpui chhia chu tunlai hian siam mek a ni a, lirthei tlan theih loh hun pawh siam a ni.
SP Kolasib chuan mipui hriattirna tichhuakin, state tana kawng pawimawh, National Highway 6 kawng chhia, Sethawn huamchhung RTP huan bul vel chu siamthat mek a ni a. Awmze nei taka siamthat hna thawh tum a nih avangin, August 19 atanga thu leh awm hma chu nitin chawhma dar 11.00 atanga chawhnu dar 1.00 inkar chhung lirthei eng chi mah tlan phal loha khar thin a ni dawn tih a sawi.
Kawngpui siamthat hna thawh dan hi, lane khat thawmthat hna thawh reng tur a ni a, lane lehlama lirthei veivak reng thei tura ruahman a ni. Darkar hnih kawng khar a nih chhung hian lirthei zawh lam lane-a lirthei lian rit tak takten kawng an dai chhiat avanga harsatna nasa zawk awm thei ven na’n lane thawmthat hna hi thawh thin tur a ni.
Hetianga kawng siamthat leh lirthei tlan dan ruahman a nih avang hian, helaia lirthei veivakte chu kawng siamna huamchhungah intlan thuah (over taking) lo tur leh traffic duty-te thu ngaichang turin a hriattir.
He thupek zawm lo chu 177 MV Act hmanga hrem an ni dawn tih sawiin, thupek hian tul bik thila Police, Fire & Emergency Services, damlo phur ambulance leh magistrate-te chetvelna erawh a huam lo tih a sawi a ni.