Shaboozey ‘A Bar Song (Tipsy)’ a la Hot ber

haboozey hla hit ‘A Bar Song (Tipsy)’ Billboard Hot 100 chart-ah a No.1 a, he chart-a kar 11 a No.1-na a ni ta a, kumina he chart-a No.1 ni rei thei ber a la ni. Hetih rual hian Chappell Roan ‘Good Luck, Babe!’ pawh top 5-ah a invawrh kai ve ta bawk.
Billboard Hot 100 (singles) chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Shaboozey ‘A Bar Song (Tipsy)’ hi kar khat chhungin US-ah stream maktaduai 28.7 leh sales 9,000 a la tling thei a, radio airplay pawh ngaithlatu maktaduai 75.3 an la tling a, hei hi chart-ah a No.1 pui leh ta a ni.
He chart-a kar ruk No.1 thei, Post Malone ‘I Had Some Help’ featuring Morgan Wallen chu No.2-ah bawk a la awm a, he, Sabrina Carpenter ‘Espresso’ pawh No.3-ah bawk a la awm.
Chappell Roan ‘Good Luck, Babe!’-in stream maktaduai 22.3, sales 4,000 leh radio airplay-ah ngaithlatu maktaduai 47.7 neiin, No.7 atangin No.4-ah a invawrh a, he chart top 5-ah Chappell Roan lan vawi khatna a ni. Lady Gaga leh Bruno Mars ‘Die With a Smile’ chu No.4 atangin No.5-ah a tawlh ve thung.
Billie Eilish ‘Birds of a Feather’ chu No.6-ah bawk la awmin, chart No.1 hlui Teddy Swims ‘Loose Control’ chu No.9 atangin No.7-ah a insawn ve leh hret bawk.
Sabrina Carpenter hla dang, No.2 pawh lo ni tawh ‘Taste’ chu No.6 atangin No.8-ah a tawlh a, a hla dang chart No.1 pawh lo ni tawh ‘Please Please Please’ chu No. No.8 atangin No.9-ah a tawlh a, Carpenter hian kar li chhung a zawnin he chart top 10-ah hian hla pathum a nei tling ta a, kumina hetiang tithei hmasa ber a la ni.
Chart top 10 khartu chu chart No.1 hlui, Kendrick Lamar ‘Not Like Us’ niin, No.10-ah bawk a la awm.