Shakira-i’n a fate privacy zah sak turin ngen

Shakira-i’n a fate privacy zah sak turin ngen
Gerard Pique nen an inthenna pawh kum khat dawn a ni ve leh ta a, Shakira chuan a fate Milan, kum 10, leh Sasha, kum 8, te chu Barcelona atangin Miami-ah a pempui ta nal nal mai a, an chhungkaw inbeng bel thar leh tur, boruak harsa an thawh laiin an fate chu zar buai lo a, an privacy zah sak turin a ngen.
Shakira chuan, “Mi hriat hlawh ka nih avangin ka nuna he hun inthlak kan tawh laia kan chanchinin mi beng a verh hi chu a hriatthiam theih e. Chutihrualin, ka fate, Milan leh Sasha te hian hun harsa an tawng ve a, zim tuau tuau leh veh kual reng an ni a, Barcelona-ah paparazzi leh chanchinbu hrang hrangin an veh reng a ni. Tunah chuan nun bul an tan thar leh dawn a, ka fate aiawhin media mite ka fate privacy zah sak hram turin ka ngen a ni,” a ti.
Shakira chuan, “Barcelona-a media ten an tih anga an school kal lut leh chhuak te lo zui ve lo turin ka ngen che u a, kan kawtah te lo nghak tlat lo ula, an intihhlimna leh hawi thawvenna lamah te pawh lo zui zel lo turin ka ngen bawk che u a ni,” a ti bawk.
Shakira chuan, “Hetah chuan journalist leh photographer-ten kan rilru leh dinhmun te inhriatthiam ka ring a, heng naupang pahnih, kum 10 leh kum 8 mi chauh, Milan leh Sasha ten nun phung pangngai an neih theih nan leh an rilru hriselna leh an himna te min ngaihpawimawh sak ka beisei a ni,” a ti.