Shanghai-ah Hurkacz a champion

Pathianni tlai khan Shanghai Masters final khelh a ni a, inkhel hmuhnawm takah Hubert Hurkacz chuan harsa takin Andrey Rublev a hneh a, a champion.
Final-ah hian world no. 17 Hubert Hurkacz-a’n tha takin bul a tan a, set khatna tir lamah break a neih a chhawr tangkai a, game thum hloh chungin set hmasa a la.
Set khatnaa hloh hnuin World No. 7 Andrey Rublev a insiamtha a, game thum chiah hloh chungin set a la let. Set khat ve ve an lak hnuin deciding set hmuhnawm tak an khel zui. Deciding set-ah hian game an inlak chhawk zak zak a, break an nei thei lo. Break an neih theih loh vangin tie-break khelh a ngai. Tie-break-ah hian Rublev-a’n bul a tan tha a, a champion ngei a rinawm hman. Hnufual zawkah tang deuh reng mah se Hurkacz-a’n huaisen takin a bei let. Point riat ve ve an hmuh laiin Hurkacz a che fuh nawn a, 10-8 a chungnungin set a la nawn leh a, 6-3, 3-6, 7-6 (10-8) a hnehna changin, a champion zui ta a ni.
Shanghai Masters final-a an intum hma khan Hubert Hurkacz leh Andrey Rublev te hi vawi li inhmachhawn tawhin, vawi hnih ve ve an chak a, 2-2 in an inhnehtawk mek. An pahnih inkara chungnung zawk tur tihchianna pathianni tlaia final-ah hnehna a chan vangin Hurkacz chuan 3-2 in Rublev lakah hma a hruai ta chiah a ni