Shillong-ah Chapchar Kut hmang
Zirtawpni khan Shillong Mizoram House-ah Chapchar Kut hman a ni a, Mizoram sawrkara Human Resources Development Board vice chairman Dr L Thangmawia, MLA chu Kut Pa niin deputy residence commissioner Lalchhanhima chu Kut Thlengtu a ni a, Prof. C.Nunthara chu resource person niin Chapchar Kut awm chhoh dan a sawi a ni.
Shillong chu Zofate tana hmun pawimawh, kan mi hmasa tam tak ten retheihna hneha an lo zirchhuahna hmun a ni tih Dr L Thangmawia hian a sawi a. Mizote chu kan rama chanchintha a lo thlen tirh laiin kan pi leh pute tih thin tam tak, Kut leh khuangte thlengin remchang loa ngaihna lian tak a awm a. Khuang phei chu khap hial niin, hun lokal zelah zu hmun sa hmun atan chauh ni lo, Pathian fakna atana hman a nih takah chuan, biak ina lakluh leh a ni a. Kut hrang hrang kan neihte pawh kan culture-a bet tlat an nih avangin kan pi leh pute hman thin dan chu chanchintha thlen hnu ah remchang vek lo mah se, khuang ang bawk hian kan rinna nen inrema hlim taka kalpui dan kan zawn zel a tul, tiin a sawi a ni.
Zofate chu Pathianin hnam angin min din chho mek tih HRD Board vice chairman hian sawiin, Mizo tawng pawh Zofate zingah kan tawng intawm (common language) turin a kal mek nia a lan avangin, chief minister Pu Zoramthanga’n Mizo Language Development Board (MLDB) din turin thutlukna siamin a bawhzui hna chu HRD Board kutah a dah a. 2022 March 10 khan MLDB Bill chu Mizoram Assembly House-ah pass niin, hnathawka theia he Board siam turin sawrkarin chak takin hma a la mek tih a sawi bawk.
Shillong-a Chapkar Kut hmannaah hian MUP Shillong Unit atangin Hlado chham a ni a, MHIP Shillong-in Par lam entirin, MSU Shillong-in Cheraw an kan a, YMA Madanrting Branch-in Sarlamkai leh YMA Shillong South Branch-in Chheihlam an entir a, mal zai leh live music-te nen hun hman a ni.
Shillong-ah Chapchar Kut hmang
Get real time updates directly on you device, subscribe now.
Next Post