Si nghak hlu ber Aaron Ramdale

Football kaihhnawih hrang hrang zirchiang a, an zirchianna tarlang thintu CIES Football Observatory chuan si nghak (goalkeeper) hlu zual 10 an tarlang a. Arsenal si nghak Aaron Ramsdale chu si nghak hlu ber a ni. CIES Football Observatory in si nghak hlu zual 10 nia an tarlante kan tarlang ang.
1. Aaron Ramsdale (Arsenal)
Arsenal si nghak pawimawh ni mek Aaron Ramsdale hian kum 2021 khan Arsenal hi a zawm a, Gunners hian Ramsdale manah £30m vel bawr an seng. Arsenal a zawm hnuin hma a sawn chak viau a, Mikel Arteta hnuaiah a par vul zui ta viau. Kum 25 mi Ramdale hian May 2023 khan kum li daih contract a ziak thar a, a hmaa a hlawh thin let zeta tam £120,000 a hlawh mek. Season liam taah Arsenal an chetthatna chhan pawimawh tak chu an si nghak Ramsdale hi a ni. A kum a la naupanga a, contract a la nei rei bawk a hei hi a hlutna tizualtu niin a hlut zawng hi €78.6M anga chhut a ni.
2. Gianluigi Donnarumma (PSG)
Kum 24 leh thla hniha upa Donnurumma hi Paris St-Germain leh Italy si nghak pawimawh a ni a. Euro 2020-ah Italy a champion pui vangin a lar leh zual hle. Donnarumma hian season liam ta khan Ligue 1-ah goal 38 a chhuah a, clean sheet vawi 13 zet a nei. Ligue-1ah an champion theih nan Donnarumma hian a thawhhlawk viau. CIES in Donnarumma hlut zawng an chhut hi €75.3M a ni.
3. Alisson Becker (Liverpool FC)
Liverpool leh Brazil si nghak Allison Becker hi kum 30 leh thla 6-a upa a ni tawh a, a hlut zawn hi € 66.8M anga chhut niin, si nghak hlu zual 10 zingah pathumna a la ni phak. Season liam ta khan beisei angin Liverpool an chetha lova, champions league an khel phak lo hial. Liverpool an chet that loh tum pawhin Alisson hi a chetha thawkhat viau thung.
4. Diogo Costa (FC Porto)
Kum 23 leh thla sariha upa Diogo Costa hlut zawng hi €65.3M anga chhut a ni a, si nghak hlu zual 10 zingah palina a ni phak teh tlat. Season liam taah a chet that vangin club lian zawk ten lak tumin an hel mek a. Club lian zawk a zawm a nih chuan a ropuina leh a hlutna zual sawt tura ngaih a ni. A kum a la naupang a, hmabak eng tak a nei. A kum naupanna hi a hlutna tisangtu a ni tel bawk.
5. Ederson Moraes
Manchester City si nghak Ederson Santana de Moraes hian Brazil club lian São Paulo FC-ah a rawlthar laiin a khel thin a. Rawlthar tha tak a nih vangin Benfica in beiseina sang tak nen an la lut. Benfica-ah a chetthat hnuin Manchester City in an la lut ve leh a, an la lut fuh cher cher hle. Season liam ta khan City hi treble champion an ni hial a. Trophy lian pathum an lak theih nana thawhhlawk tak pakhat si nghak Ederson hi a ni. Kum 29 leh thla riata upa Ederson hlut zawng hi €56.9M anga chhut a ni.
6. Thibaut Courtois
Belgium leh (Real Madrid) si nghak Courtois hi si nghak tha sawi a pianga sawi tel a mawi a ni. Real Madrid leh Belgium tan a khel tha thei viau a, a hlut zawng hi €52M anga chhut a ni a. Si nghak zingah chawimawina sang dawng tur an awm a nih chuan Courtois hi dawn phu ber zinga mi a ni.
Si nghak hlu zual 10 zingah hian Gregor Kobel (Borussia Dortmund) – €48M, Jan Oblak (Atletico Madrid) – €40M, Andre Onana (Internazionale) – €37M leh Alex Merret (SSC Napoli) – €36M te an tel bawk.