Siaha District-ah raltlan pung leh

Tun hnaiah Champhai district-ah raltlan an pung a, Champhai district te ang pui pui ni lo mah se Siaha district-ah pawh tunlaiin raltlan lut thar an pung leh.Thu dawn danin, Siaha district dep Myanmar lamah tun hnaiah Myanmar sorkar sipaite leh sipai sorkar paih tumtute an inkap nasa a, sorkar sipaite hian indo thlawhna pawh an hmang nia hriat a ni. Hei vang hian Siaha district-ah raltlan lut thar an awm leh.
Home department chuan chawlhkar liam ta Ningani leh Zirtawpni khan Myanmar atang hian Siaha district-ah raltlan mi 123 vel an lut tih The Aizawl Post an hrilh.
Inrinni leh Chawlhni-ah pawh raltlan lut thar hi an la awm turah an ngai a, mahse a zat tak hriat a ni rih lo tih an sawi a, an buai zel chuan tun karah pawh raltlan hi an pun a rinawm tih an sawi.
Hriat theih chinah Laki, Zawngling, Chapui, Ahmyipi, Mobyo, Siasi, Khopai leh Theiva khuaah te raltlan lut tharte hi an lut a, khaw dangah pawh an awm a rinawm tih thu dawn a ni.
Home department hotute sawi danin, hetia an tlanlut hi tlawmngai pawl te’n an lo dawngsawng a, riahna tur leh chaw eina tur pawh tlawmngai pawlte hian a theih ang angin an ngaihtuahsak a ni.
Siaha district dep Myanmar lam hi an inkap nasa zui lo nia hriat a ni a, mahse ni hnih khat lekah an boruak a inthlak thut thut thei a, an inkah loh pawhin mipui nunau hian an sahimna zawnga tlanchhuah an duh thin tho bawk a, chuvangin raltlan hi a pung leh thei tih thu dawn a ni.
Champhai district-a tlanchhiate ang bawkin Siaha district-a tlanchhiate pawh hi an tlanluhna khuate nena inhnaivai, inhnimhnai sa leh inpawh sa an ni a, raltlanah pawh hian belh tur nei sa an awm nual tih thu dawn a ni.