Sialkal tlangdung inrelbawl ve tura sawrkar rawtna siamtha leh dawn

Paite hnam tamna, Sialkal tlangdungin anmahni puala inrelbawlna tur – Development Council an neih ve theihna dan siam tuma sawrkarin rawtna a siam chu a felfai tawk lo niin Mizoram State Legislative Assembly chuan a ngai a, Assembly Selection Committee-in a lo siamrem turin a pawm thung.Thawhtannia Assembly Session-ah General Administration Department changtu chief minister Lalduhoma chuan House-ah ‘Sialkal Range Development Council Bill 2026’ a pulut a. A bill putluh chu a ‘sensitive’ a, civil society pawh a nghawng a, member-ten Central YMA atangin lehkha an dawng hlawm tih an hria a. Lungrual taka kalpui a thaa an hriat thu sawiin, thangthar lo awm zel thlengin tuna roreltute an kawhrawn a an dem theihna a ni a, lungrual taka kal tlan tha an ti tih a sawi a ni.
He bill a sawizaunaah chief minister chuan, ‘Sialkal Range’ hian khaw 6 – Saitual district-a khaw 4 leh Champhai district-a khaw 2 a huam a, MLA bial hniha awm a ni. MLA bial khat, district pakhat hnuaia awm ni thei se a duhawm hle a, a ram thlengin a zir miau loh avanga hetianga tih a ni tih a sawi.
Kum 2012-ah Sialkal Tlangdung Development Board tia bul tan a ni a, 2013-ah Board tih hi thlakin Sialkal Range Development Council (SRDC) tih a ni. Board/ Council member-ah a huam chin khaw 6-a village council aiawh pakhat theuh an awm nghal a, MLA bial pahnih a huamah Ngopa lam zawk awmna (tuna Lengteng bial) chu chairman a ni ang, tiin danah hian dah a ni.
Chief minister sawi danin, Council hi act pangngai hnuaia enkawl ni tawh se, tih rawt a ni a. A bul tantu Congress sawrkar laia chief minister Lal Thanhawla chuan kum 2014 Assembly Session-ah he Board/ Council din tur hian sawrkarin eng tehfung mah a hmang loa, sum an neih ang chinin an ti ve tawp a, nuai 50 in bul an tan tih a sawi. Act emaw Rules emaw siama chei sawrkar teh vak an duh lo tih House a hrilh.
MNF sawrkar hnu, kum 2020-a SRDC office building a hawnnaah chief minister Zoramthanga chuan, dan puitling siamin Council of Ministers meeting hmasa bera pass sak an tum thu a sawi a; tun thlengin a la puitling loa, ZPM sawrkar hnu ah an en a, sawrkar hmasa in draft rules a lo siam tawh tam zawk ringin tih dang lam zeuh zeuh erawh an nei tih a sawi.
Dan thar duan rawtnaah hian, SRDC member 6 hi mahni khuah theuhah VC-te ni tawh loin a thlanin an thlang tawh dawn a, voter-ah MLA inthlana vote neite hman tur a ni. State Election Commission-in a buaipui ang, tih a ni. Sawrkarin nominated member 1, a vaiin member 7 awm anga, elected member in CEM tur an thlang anga, EM pakhat a awm ang. Memdang dang 5 an awm dawn a ni.
Official lamah Mimbung chu headquarters a ni anga, Council secretary-ah BDO aia hniam lo an hmang ang, tih a ni.
Bill puluttu chief minister hian he thil hi a sensitive avangin House-a sawiho tur chungchangah leader of opposition ngaihdan lak hmasak a duh tih a sawi a. Leader of opposition Lalchhandama Ralte chuan, cabinet-in uluk taka a ngaihtuah hnua House-a pawm tura a rawn chhawp a ni tawh a, House dawhkana pharh a ni tawh a, member-ten sawiho ngei nise tha a tih thu a sawi.
Sawihonaah eptu member-te chuan he dan siam hi a phuaialuai a, siamthat ngai tam tak a awm bakah hnam/ chi bil hmasawnna hna thawhna tur anga lang, a huam chin zim viau bawk si a ni a, rawn awm chi civil society, political party leh midangte rawn zau hma chu pawm loin hnuhkir leh mai nise, tiin an rawt a ni.
Ruling member lam atanga sawitu thenkhat pawhin Bill chhawpchhuah hi a fel tawk lo tih an phat loh thu an sawi rualin, siamrem ngai siamrem turin pass phawt nise, tiin an rawt ve thung.
Parliamentary Affairs minister Vanlalhlana chuan famkimlohna tam tak siamtha turin Selection Committee a dah mai turin House a ngen a. Leader of opposition leh house leader, bill puluttu ni bawkin an tlip hnu ah, Select Committee-in siamthat ngai te siamtha se, chumi hnuah House-a pharh tura chhawp leh nise, tiin pawm a ni.
Chief minister chuan, bill hi a nihna anga pawm ni lo mah se, Sialkal Range Development Council hi a kal reng tho a, he bialin bial dang ruala ke a pen theihnan sawrkarin a ngaihsak zel dawn tih a sawi a ni.