Post titlem zawnga kal a har hle – Chief minister

Sawrkar hna sang lamah post titlem zawnga hma lak a har hle tih chief minister Lalduhoma chuan a sawi.
Assembly Session-ah General Administration changtu chief minister chuan, sawrkar office file kalmuang chu an vei hle a, amah phei chuan a hnena file lokal chu a approve chu, a lehkha under secretary-in a sign a, a issue zui mai tur a nih chuan direct-in a concerned under secretary-a kal nghal turin a ti mai thin a, a inkar zawng zawnga file a kal a tum lem lo tih a sawi.
“File kal chak tur chuan a khaidiat chho kha a tlem a ngai a, under secretary awm se, deputy secretary emaw awm leh se, secretary awm leh mai se; a inkarah joint/ additional secretary tih vel kan nei ta thluah mai a, post titlem leh tibo zawnga hma lak hi a har. Sawrkar hnathawkten kaisanna tura an chhungkuaa an lo intinzawn ve ngar ngar a ni a, heti zawnga hma lak pui hi a rang duh vak lem lo. Amaherawhchu tih hram hram kan tum a, post thenkhat phei chu an pension ruala a post bo zui mai tura tih pawh kan nei,” a ti.
e-File in an kal nasa tawh a, secretariat-ah phei chuan an kal nasa tawh a, directorate leh district lamah tih chhoh zel an tum tih chief minister hian a sawi. e-file ah chuan a chak lo thei loa, a pending chuan tu bulah nge, engtia rei nge a pending tih a hriat theih zel tawh a, digitisation system thar chuan file kalmuang thin chu a rawn siamtha chho mek tih a sawi a ni.