Sihphira bawng vulhtute a thlawnin bawng chaw pe

Selesih AH & Vety Farm-ah Durtlang leh Sihphira bawng vulhtu mi 41 hnenah AH & Vety minister C Lalsawivunga chuan Thawhlehni khan a thlawnin bawng chaw tur buhpawl a sem.
Thenzawl Vety Farm-a ran chaw (fodder) chinna hmun, acre 57-a zau chu minister ho hian kum 2023- 2024 chhung khan acre 70-a zauhin, a vaiin acre 127 a huam a. Selesih Hay House atangin fodder tharchhuah hi a thlawn in sem a ni.
AH & Vety minister chuan bawnghnute, artui leh saa intodelh tur chuan ran chaw atanga bul tan a ngai a. A chawa intodelh hmasak loh chuan a intodelh tak tak theih loh tia sawiin, “Hemi kawnga hma lak mekah department thawktuten kuthnathawktute tana inpekna tak tak nen thahnemngai taka an thawk hi a lawmawm a ni,” a ti. Kuthnathawktute khawsak dinhmun tha zawka hlankai chu sawrkarin a ngaipawimawh a, state sum indaihlohna karah a theih chin china hma lakpui zel an ni dawn tih a sawi a ni.
Thenzawl bakah AH & Vety department chuan Selesih, Thingdawl, Lungpuizawl, Mampui leh Siaha ah ran chaw a ching a. Heng hmun amite erawh hralh emaw thawn chhuah tham niloin a hmuna ran vulhte tana hman mai a ni. Ran chaw a thlawna sem chhuah bak hi chu man tlawm thei ang bera hralh chhuah zui tum a ni.