Sikkim tuilianah nunna chân 14 chuang tawh

Sikkim-a tuilian thut avanga nunna chan mi 14 chuang tawhin mi 102 an zinga Army personnel 22 telna te chu an chin hriat lohin an awm mek a. North Sikkim a Lhonak Lake cloudburst chuan Teesta river basin-ah tuilian thut a siama ni.
Tuilian thut thlenna chhan ber hi Chungthang dam, Arunachal Pradesh a luan liam vang a ni a.
National Remote Sensing Centre, ISRO centre pakhat chuan satellite-based study neiin South Lhonak lake luan liam dan zirchianna an nei zui a.
National Disaster Management Authority te chuan Sikkim-a tuilian thut awmna chhan hi ruahsur nasa avang leh Glacial Lake Outburst Flood (GLOF) event vang tiin an sawi.
Defence Ministry te chuan chin hriat loh te zawnna hi Teesta River mawng lamah an neih mek thu an sawi a. Singtam bula Burdang a vehcile a len te chu lakchhuah tuma hma an lak mek thu an sawi bawk a. Sipai 23 bo zingah sipai pakhat chu October 4 tlai lam khan dama hmuh a nih thu Ministry thupuangtu chuan a sawi bawk a.
Tun dinhmunah mi 2,011 lai chhanchhuah ni tawhin tuilian hian mi 22,034 vel a tibuai niin Sikkim State Disaster Management Authority (SSDMA) chuan a tarlang a.
State sorkar chuan relief camp 26 dinin tuilian hian district pali a khawih buai a. Gangtok district a relief camp pariatah mi 1,025 dahkhawmin an awm mek bawk.
Congress president Mallikarjun Kharge chuan Sikkim tuilian chuan ngaihven a hlawh a ngai tia sawiin Centre chu Sikkim tuilian leh Himachal Pradesh tuilian te chu national disaster a puang ve ve turin Centre-a NDA sorkar lai mek chu a ngen bawk.