Sikul naupang himna atan hriat tur tul anmahni enkawltuten zir
Sikul naupang himna atan hriat
tur tul anmahni enkawltuten zir
Sawrkar laipui National Commission for Protection of Child Rights leh Directorate of School Education Mizoram tangdun chuan Nilaini khan Aizawlah ‘Conference on Key Child Rights Issues’ an bautsaih a, School Education Department hnuaia officer-te leh zirna in thawkten naupangte himna leh an dikna chanvo hrang hrang an zir.
School Education secretary David Lalthantluanga chuan, naupangte dikna leh himna chu zirna inah kenkawh ngei ngai a ni a. Sawrkarin rules, instruction, guidelines siam thin mah se, a field-a tihhlawhtlin chu a pawimawh lai tak a ni, tiin, zirna in hrang hrangin Juvenile Justice Act leh POCSO Act an hriatchian a tul a, school leh a chhehvel chu zirlaite tan hmun him ni tura vawn a pawimawh tih a sawi a ni.
School Education director Angela Zothanpuii pawhin naupangte chungah thil fello leh tha lo tam tak a thleng thei a, hengah hian dan leh hrai hmangin engtin nge kan humhim ang, tih hriat a ngai tih a sawi a. Naupangte himna bakah tawhsual an tawhin engtia hmalak tur nge tih hriat a, zirtir bakah naupangte venhim chu sikula thawktute tih tur a ni tih a sawi.
Mizoram State Commission for Protection of Child Rights chairperson Jimmy Laltlanmawia chuan, naupangte chu an hmalam hun ringawt ngaihtuah loin, tuna an dinhmun mek ngaihtuah a ngai tih a sawi a. School-te himna an zirchiannaah sawrkar sikul chu average chunglamah an awm a, school thenkhat chuan naupangte rights an ngaipawimawh lo hle tih a sawi a ni.
Civil judge F Laltlansangi, WCD principal programme manager Amy Lalrinpuii, addl SP CID (Crime) PC Liansiampuii, SCERT lecturer Zozikpuii leh SDEO East & West Caroline Rinthanpuii Fanai ten an zirtir a. Zirhonaah hian naupangten an zia an thlakin ngaihthah loh tur, kawmchian tur, khawih chhiat an nih chuan an kekawrte leh thawmhnaw sufai mai loa vawnthat tur, naupang thiltisual chu Juvenile Justice Board hmaa hruai tur, tihte sawi a ni. Naupang chhungte leh an bulhnaia awmten mihring hmanga sumdawnnaa an hralh dan leh nawr luih dan, zirna ina thawkte hriat tur sawi a ni bawk.