SIKUL

By Zoremi Hmar Zote

Eng vangin nge sawrkar sikul aia private sikul kan bawh zawk; eng vangin nge nei leh nei lova kan fate private sikulah kan dah hram hram tih leh, eng vangin nge admission fee tlawm fê zawk bawk si, monthly fee awm bawk si lo sikul chu kan bawh ruih ruih zawk loh tih hi ngaihtuah tham fê a awm.
Kan ram sawrkar sikul:
Sawrkar sikul te hi private sikul te aiin sikul hmunhma leh building a changtlung zawk tlangpui a, zirtirtute pawh trained vek an ni. An hlawh a sâng zawk daih a, hlawh mai bakah hamthatna hrang hrang an nei a, facility an nei tha zawk. Heti chunga private sikul an tluk thei miah lo mai hi thil mak tak a ni a, administration leh discipline lamah education dept lam hian nasa taka tan an lak a ngai niin a lang. Result-ah private lam an tha zawk daih zel a, hlawh tlêm zawk, hmunhma leh facility nei chhe zawk bawk si; thahnem an ngai zawk tihna a ni mai a, private zawkin quality an nei tha zawk tlat mai hi a mak a, kan sawrkar chak tak hian tan lain han tang ve tak tak mai se, zirnain hma a sawn duak duak thei dawn. New Delhi Aam aadmi sawrkar pawh an han tang tak tak mai a, private sikul lehpelin mipuiin sawrkar sikul an bawh ruih ruih mai asin!
Kan naupan laiin kan zirtirtu pakhat chuan naupangte min zilhhaunaah, “Nangni hi rawn kal miah lo pawh ni ula, kan hlawh a kiam phah chuang lo,” a tih hi ka la hre reng mai. Zirtirtu zinga thenkhatin hetiang rilru hi an pu palh a nih vaih chuan result tha beisei ngam chi an ni lovang. Naupang hmangaihna tak tak nena an hna an thawh a ngai a, hlawha lungawi mai a, a hming chauha zirtirtu hna an thawk a nih chuan result tha neih ngaihna a awm lo. Zirtirtute reng reng a ngheta thawk an ni deuh vek a, sikul naupang an tlem paw’n hlawh ngai, an tam paw’n hlawh ngai tho a nih avanga inthlahdahin, naupang an neih tlêm leh an hahdam a ni mai a, chuvang chuan sawrkar sikul thenkhatah hi chuan naupang ngah turin tan an la peih lo em mawni chu aw a tih theih. Sawrkar sikul zawng zawng an ni vek lo a nia, sawrkar sikul zinga thenkhat ka tihna a ni e; ka fanu ngei pawh Govt.Chaltlang High school-ah ka luhtir a, extra class te nei thinin an tang khawp mai.
Sawrkar sikul a that leh em emna pakhat chu ‘a te-a tening ngat’ an nihna hi a ni; naupang zei zia an man a, zirtir dan tur an thiamin harsatna neite pawh hriatthiamna thûk tak nen kaihruaiin naupang an enkawl a, hei hi an that bikna a ni. Ai kal la a, mahni in luma awm der der tam tak kârah a hah-a te chu an hah em em a, sikul ban hun pawha bang ve thei lovin naupang extra class an neihpui a, result tha mai piah lamah zirlai ten thiamna tak tak an neih theih nan nasa takin hma an la a, an zirlaite hi an vei tak zet thin. Hetiang zirtirtu tha hi kei pawn ka hre nual mai; admission hautak si lo, monthly fee awm bawk si lova fate dah hi intihhmuh tawh zawk ila a tha ngawt ang, kei paw’n ka dah!
Private sikul:
Chutih rualin private sikul lâr deuh, top 10 chin hauh zat zat thei sikul tlem te an awm a, an sikula lut tur lo test-tir thlap, a thiama te chauh la thin an awm ve leh bawk a, naupang thiam thei hlir admit-na sikul na na na chuan result tha an nei lo thei lo ve bawk a, kan sawrkar sikul te hian private sikul duh loh hnu an khâwm ve deuh bawk pakhat. Sikul pakhatah phei chuan pawl sawm zir tur chu hostel-ah an dah nghal hmiah a, hostel-a awm ve lo chu exam dawnah an chhawk mai a, exam ve an phal lo. (Hei hi a taka kan tawn ngei a ni) Hetianga a thiam thei chauh la a, examtir na na na chuan result tha an nei lo thei lo va, thiam thei lo deuh tan chuan kawng a ping em em thin. Chu mai bakah private sikul chuan naupang sikul fee atanga hlawh la an nih avangin an tang lo thei lo va, naupang an tam theih nan leh mipui hriat khawpa result tha neih nan leh, nu leh pain an ît tur khawpa result tha an neih theih nan zirnaah leh decipline-ah theihtawp chhuahin an tang mai thin. Hei vang hian private sikul hi a tha lo thei lo!
Khaikhawmna:
Kan education system innghahna lian ber pakhat chu result tha a ni. Private sikul te hian exam oriented deuh hian zirtirna an kalpui nasa a, note in by-heart-tir tlut tlut system kalpui hi a tam zawk hi an ni mai thei; hei hi sawrkar sikul tam zawkah chuan kalpui a ni lem lo. Chuvang chuan private sikul an pha lo tlangpui; education chu ‘all round development’ tiin kan sawi thin a, hemi kawng bikah erawh hi chuan private sikul tam tak hi chu an hlawhchham ve viau tho chuan ka hria. Spoon feeding education hi exam based education-ah chuan result tha neih theih nan chuan a tha viau a nih hmel a, thiamna tak tak pawchhuaktu a ni em tih erawh zawhna lian tak a la ni tho mai.
Eng pawh ni se sawrkar sikul emaw, private sikul pawh ni se, lehkha thiam mai bakah nunphung dik te, nun dan mawi leh tlawmngaihna te, aia upa zah leh kan Mizo nuna a mawi lai te uar zawka inzirtir tel ni se la, lehkha thiam sâng chapo deuh, mawl deuh, tui leh changkang, chhuak thar hre em em si kan chhuah teuh palh ang tih a hlauhawm e. Lehkha thiam sàn ringawt hi hlawhtling tehna tur a ni lo va, hringnun awmze man thiam leh an thiamna phêna belhchian dâwlte hi mi hlawhtling chu an ni zawk e.